Իմ անչափահաս երեխաներին սկսել են հետևել, հեռախոսները լսել․ դա խոսում է իշխանությունների մեծ վախի մասին․ Արթուր Վանեցյան

Վերջին մի քանի օրերին ակտիվացել է քաղաքական դաշտը։ Երբ ես հունվար ամսին առաջին անգամ հայտարարեցի, որ Նիկոլ Փաշինյանը պետք է հրաժարական տա, այդ ժամանակ բոլորի համար զարմանալի էր, թե ինչու այդպիսի հայտարարություն արեցի ես։ Այս մասին Հրազդանում «Հայրենիք» կուսակցության գրասենյակի բացումից հետո կուսակիցների և լրագրողների հետ հանդիպման ժամանակ հայտարարեց «Հայրենիք» կուսակցության նախագահ Արթուր Վանեցյանը։ Հաղորդում է Tert.am-ը։ 

Նրա խոսքով՝ ժամանակը ցույց տվեց, որ դրա մասին այժմ խոսում են գրեթե բոլորը, և դա դարձել է մեր քաղաքացիների և հանրության քննարկման օրակարգային հարցերից մեկը։

«Այդ օրակարգը պետք է ամրապնդվի, առաջ մղվի, և այդ օրակարգի շուրջ պետք է լինի քաղաքական ուժերի համաձայնություն»,- ասաց Վանեցյանը։

Նա հայտարարեց, որ իր ընտանիքի անդամներին գաղտնալսում են, և իր՝ աշխատանքից դուրս գալուց հետո իշխանությունները լծվեցին իրեն մեկուսացնելու գործին։

«Փորձեցին ամեն ինչ, շինծու գործեր, շինծու մեղադրանքներ, իմ վերաբերյալ տարածվող բոլոր տեղեկություններից, ինչպես տեսաք, որևէ մեկը չհաստատվեց։ Օգտագործվեցին այն մանիպուլյատիվ գործիքները, որոնք այս իշխանությունները կարողանում են հաջողությամբ օգտագործել և ժողովրդին մոլորեցնել։ Ինչ վերաբերում է ինձ ձերբակալելու լուրին, այո, խնդիր էր դրվել, որ ինձ ինչ-որ մի կերպ մեկուսացնեն, գոնե երկու ամսով, ինչ-որ մի շինծու գործով»,- ասաց Վանեցյանը։

Նրա խոսքով, հետագայում երկար քննարկումներ են եղել իրավապահ համակարգում, ինչի արդյունքում հասկացել են, որ իրեն որևէ մեղադրանք չեն կարող օրինական ձևով ներկայացնել և այդ գաղափարից, կարծես թե, հետ են կանգնել։

«Բայց դա ժամանակի հարց է և այս իշխանություններից ամեն ինչ սպասելի է։ Արդեն հասել են մի իրավիճակի, երբ տոտալ հսկողություն են սահմանել ինձ հետ շփվող մարդկանց հետ և անգամ իմ անչափահաս երեխաներին սկսել են հետևել, հեռախոսները լսել և այլն։ Դա խոսում է իշխանությունների մեծ վախի մասին»,- ասաց Արթուր Վանեցյանը։

Նրա խոսքով, այս իշխանությունները հասկանում են, որ արդեն չունեն ժողովրդի աջակցությունը և այս իշխանության ապաշնորհ կառավարման և տարածվող ստերի հետևանքով կորցրել են իրենց հենարանը՝ ժողովրդին, և ժողովուրդը հասկանում է, որ այսպես շարունակել հնարավոր չէ։

Աղբյուր՝ Tert.am