2 մահ է գրանցվել՝ վերակենդանացման բաժանմունքում տեղ չլինելու պատճառով, քրեական վարույթ պետք է հարուցվի, թե՞ ոչ․ Նաիրա Զոհրաբյան
Մարդու իրավունքների պաշտպան Արման Թաթոյանը Ազգային ժողովում բյուջեյի կատարողականի քննարկման ժամանակ անդրադարձավ վարչապետ Նիկոլ Փաշինյանի հայտարարությանը, որ հիվանդանոցներում տեղ չլինելու պատճառով կորոնավիրուսով երկու հիվանդ է մահացել։
ԲՀԿ խմբակցության պատագավոր Նաիրա Զոհրաբյանը օմբուդսմենին հարցրեց՝ երկու մահ է գրանցվել՝ վերակենդանացման բաժանմունքում տեղ չլինելու պատճառով, ի վերջո քրեական վարույթ պետք է հարուցվի, թե՞ ոչ։
Հիշեցնենք, որ Նիկոլ Փաշինյանն օրերս ասել էր՝ երկու մահվան դեպք ենք ունեցել, երբ պացիենտը պետք է լիներ վերակենդանացման բաժանմունքում, բայց ինքը գտնվել է ընդհանուր բաժանմունքում վերակենդանացման բաժանմունքում տեղ չլինելու պատճառով։
«Որպեսզի վարույթ հարուցելու հարցը լուծվի, պետք է հասկանալ կոնկրետ գործի հանգամանքները, այս կամ այն դեպքը, ինչ պատճառով է եղել, պաշտոնատար անձի մեղքով է եղել, չի եղել, որ պահին է վրա հասել և այլն։ Այսինքն՝ այնքանով որքանով օրենքն է պահանջում և Մարդու իրավունքների պաշտպանի իրավասության սահմաններում է, մենք հիմա սպասում ենք նաև դրա հետ կապված գրությամբ այդ հարցը բարձրացնելու։ Սպասում ենք նաև պարզաբանումների, պրոցեսը մեր մոնիտորինգի տակ է, որ հասկանանք մեր հետագա գոծողությունները։ Այս պահին ժամանակավրեպ կլինի քրեական վարույթի մասին խոսելը, և իրավասության ծավալի առումով առնվազն ճիշտ չի լինի, որպեսզի ես հիմա կանխակալ գնահատականներ հնչեցնեմ»,- ասաց Արման Թաթոյանը։
Հետևեք մեզ Facebook-ում