Ես հասկացա, որ այդ պատգամավորն է այս գործողության քավորը, որովհետև անգամ Արցախի իշխանությունների ներկայացուցիչները հերքում են, որ մեզ փակել են. Հ. Հարությունյան
Մեզ ոչ մեկ և ոչ ոք չի տեղեկացրել, որ մեր հեռարձակումը դադարեցվելու է Արցախում, այն որ հունիսի 1-ից մեր հեռուստաընկերության հեռարձակման դադարեցվելու է Արցախում՝ ես լսել եմ Երևանում՝ մեզ բոլորիս շատ հայտնի անկախ պատգամավորի շրջանակներից և քմծիծաղով եմ մոտեցել այդ ինֆորմացիային, որովհետև ինչ կապ ունի այդ անձը, որ նման բան ասի իր շրջապատում։ Այս մասին ArmDaily.am-ի հետ զրույցում ասաց «5-րդ ալիք» հեռուստաընկերության գործադիր տնօրեն Հարություն Հարությունյանն՝ անդրադառնալով Արցախում հունիսի 1-ից «5-րդ ալիքի» հեռարձակման դադարեցմանը։
«Հունիսի 1-ից, երբ լուր ստացա, որ «5-րդ ալիքն» Արցախում չի հեռարձակվում՝ ես փորձել եմ հասկանալ, թե ինչն է պատճառը ու չեմ ստացել որևէ հոդաբաշխ պատասխան։ Փորձել եմ ճշտել Արցախի՝ իմ համար նախագահի, իրենց համար մարզպետի աշխատակազմից։ Ինձ հավատացրել են, որ Արայիկ Հարությունյանը հնարավոր չէ, որ նման բան ասեր։ Զանգել եմ Արցախկապի տնօրենին, ինձ ասացին խնդիրը տեխնիկական է, անջատել են, քանի որ Ֆրանսիայից սարք են պատվիրել, թե այդ սարքը երբ կգա, հայտնի չէ։ Ես ասացի, որ մինչ այդ սարքը՝ մենք նորմալ հեռարձակվել ենք, ի՞նչ կապ ունի սարքը դադարեցման հետ, ես լսել եմ, որ պետք է դադարեցվի հեռարձակումը, տնօրենը սկսեց կմկմալ, թե ինչ ես ասում, չէ։ Երեկ երեկոյան այդ անկախ պատգամավորը, ով օտարերկրյա ծառայությունների գործակալ է, և հատուկ ծառայություններ է մատուցում, գրեց որ «5-րդ ալիքը» փակվել է Արցախում և, որ հեղափոխությունը հասնում է Ղարաբաղ։ Թե վաղը կամ մյուս օրը ինչ է լինելու Ղարաբաղում՝ չգիտեմ։ Ես հասկացա, որ այդ պատգամավորն է այս գործողության քավորը, որովհետև անգամ Արցախի իշխանությունների ներկայացուցիչները հերքում են, որ մեզ փակել են, իսկ ինքը հաստատում է։ Այսինքն, իրեն խոստացել են, որ կփակեն, ինքը հաստատեց, որ իրեն խոստացել են, որ կփակեն։ Թե ինչ կլինի վաղը Արցախում, ես չեմ ուզում եզրակացություններ անել, սակայն այսպիսի մարդկանց քավորությամբ ավելի վատ և ավելի սարասափելի բաներ են տեղի ունենալու Արցախում»,-ասաց Հարությունյանը։
Նա ընդգծեց, որ որևէ մեկը չի ասում, թե որքան ժամանակից կվերականգնվի հեռարձակումը։
«Գիտեք՝ շատ հարմար պահ է նման բան ասելու համար։ Հասկանալի է չէ, որ այս պանդեմիայի իրավիճակում, երբ Հայաստանը կտրվել, մեկուսացվել է աշխարհից՝ ի՞նչ սարքի գալու մասին է խոսքը, ինչպե՞ս պետք է գա, ե՞րբ պետք է գա, ինչի՞ այդ սարքը, ասենք, 1 տարի կամ 6 ամիս առաջ չէին բերում»։
Հարությունյանն այս ամենի ներքո տողատակեր է տեսնում․ ըստ նրա՝ խնդիրը ամենևին էլ հեռուստաընկերության հեռարձակումը դադարեցնելը չէ։
«Սա առաջին փորձն է արցախցիների վրա։ Սրանից հետո ավելի վատ բաներ են լինելու։ Հիմա փորձում են հասկանալ, թե Արցախում սա ինչպես են ընդունելու, հետո կսկսեն ինչ-որ գեներալի ձերբակալել, հետո՝ ինչ-որ նախկին պաշտոնյայի, ինչ իմանամ, գուցե նախկին նախագահի ձերբակալեն, այն մթնոլորտը, որ Հայաստանում կա, հիմա փորձում են Արցախում մեկին մեկ քոփի-փաստ անել նաև Արցախում, վերջապես խնդիր ունեն իր առջև դրված, հենց այնպես չի այդ ձերբակալումները, հենց այնպես չի այս ամենը կատարվում, այս ամենի վերջնակետը ուրիշ բան է։ Իսկ երբ այդ խաղի մեջ խառնվում են նաև օտարերկրյա ծառայութունները, բնական է, որ այդ վերջնակետը մեր բարօրության համար չի, այլ իրենց ցանկալի նպատակներն իրականացնելու համար»։
Հարությունյանի դիտարկմամբ՝ ծիծաղելի է ինտերնետի դարում փակել հեռուստատեսություն, ի վերջո նույն արցախցին կարող է մտնել ու նայել հաղորդումները յութուբով, ֆեյսբուքով, ցանցահեն կայքերը տանում են հեռուստաընկերության հաղորդումներն ու ցույց են տալիս։ Արցախի նախագահի մամուլի խոսնակ Վահրամ Պողոսյանն իր ֆեյսբուքյան էջում գրել էր, որ տեխնիկական խափանման պատճառով մի շարք հեռուստաալիքների ազատ հեռարձակումը (անվճար) «Արցախ կապ» ՓԲԸ կողմից ընդամենը ժամանակավորապես դադարեցվել է:
«Դրանում քաղաքական ենթատեքստ տեսնողներին խորհուրդ կտամ ավելի օգտակար գործով զբաղվել»:
Հիշեցնենք, որ հունիսի 1-ից Արցախում դադարեցվել է հայկական 5 ալիքի հեռարձակումը, որոնց թվում են «5-րդ ալիքը», «Շողակաթը», «Ա ԹԻ ՎԻ» հեռուստաընկերությունը:
Հետևեք մեզ Facebook-ում