Շուտով դպրոցներում խաղ-դասընթացներ են կազմակերպելու՝ աղջիկը լինի տղայի դերում և հակառակը. Գրիգոր Գրիգորյան. Տեսանյութ

«Լանզարոտի» կոնվենցիայի վավերացումը տեղի է ունեցել գաղտնի: Մենք ԱԺ-ում ունենք պատգամավորներ, ովքեր համաձայն են, որ սեռական հարաբերությունների հաստատման տարիքը լինի 13 տարեկանից: Այս մարդիկ համաձայն են, որ տարրական կրթության տարիքի երեխաներն անցնեն այս դասընթացները, որը հանգեցնելու է հոգեկան խեղումների:

Այս մասին Արմնյուզ ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է «Առողջ հանրություն» ՀԿ ղեկավար Մարինա Խաչատրյանը:

Հաղորդման մյուս հյուրի՝ «Մեկ առողջություն» կոալիցիայի համահիմնադիր Գրիգոր Գրիգորյանի խոսքով՝ այս կոնվենցիան իսկական վտանգ է մեր հանրության համար. «Այս կոնվեցիան իսկական գրոհ է, որն ունի իր նախապատմությունը: Մինչ այս կոնվենցիայի վավերացումը, Հայաստանում ընդունվել են գենդերային հավասարության, ընտանեկան բռնության մասին օրենքները»:

Ըստ Գրիգոր Գրիգորյանի՝ այս օրենքների ընդունման փոխարեն կարելի էր մեր քրեական օրենսգրքում կատարել խիստ փոփոխություններ. «Ես համոզված եմ, որ այսպիսով դպրոցներում կազմակերպելու են «խաղ-դասընթացներ», այսինքն՝ տղան կարող է աղջկա դերում լինել և հակառակը»:

Հոգեբան Կարինե Նալչաջյանի դիտարկմամբ էլ՝ այս կոնվենցիան սերտորեն կապված է տխրահռչակ «Ստամբուլյան կոնվենցիայի» հետ. «Որևէ ծուղակ առանց խայծի չի լինում: Կանայք և տղամարդիկ ոչ միայն անատոմիական տարբերություններ ունեն, այլև մենք սեռային դաստիարակություն ենք տալիս երեխային՝ ասելով, օրինակ՝ աղջիկը բարձր չի գոռա, տղան պետք է պաշտպանի աղջկան»:

Կարինե Նալչաջյանն անհանգստացած է «Լանզաորտի» կոնվենցիայի 6-րդ կետը. «Ամենամեծ վտանգն այն է, որ այն բերվելու է կրթական համակարգ: Պատկերացնում ե՞ք՝ ինչ-որ մարդիկ դիտակտիկ նյութերով, պրեզենտացիաներով սկսելու են դասավանդել: Մարդու հոգեսեռական հասունացման փուլեր գոյություն ունեն, իսկ տարրական դասարանում նման բան դասավանդելը նպատակահարմար համարելու համար տարրական հոգեբանական գիտելիքներ ունենալ»:

Հոգեբանը մտավախություն ունի, որ այս կոնվենցիան կարող է հանգեցնել պեդոֆիլիայի:

Մարինա Խաչատրյան համոզված է, որ այս կոնվենցիան հանգեցնելու է մանկապղծության. «Մենք ունենք օրենքներ, որոնց կիրառման դեպքում՝ բռնության, սեռական բռնության դեպքերը նվազել են, որը ներկայացրեց նաև Արդարադատության փոխնախարարը: Այս կոնվենցիան իրականացնելու է թե՛ համասեռամոլության, թե՛ մանկապղծության քարոզ»:

Գրիգոր Գրիգորյանն էլ կարծում է, որ այն մարդիկ, ովքեր կողմ են քվեարկել այս կոնվենցիային պիղծ հոգիներով պիղծ մարդիկ են: