Արման Բաբաջանյանը Նիկոլ Փաշինյանի նկատմամբ քրեական գո՞րծ է ուզում հարուցել

Այսօր ԱԺ-ում կորոնավիրուսի վտանգների մասին խոսելիս պատգամավոր Արման Բաբաջանյանը այն տեսակետով հանդես եկավ, որ այն մարդկանց հանդեպ ովքեր կասկածի տակ կդնեն կորոնավիրուսի իրական լինելը պետք է քրեական գործ հարուցել: Բաբաջանյանի հիմնավորումն այն էր, որ այդ մարդիկ, անկեղծ, թե կանխամտածված քաղաքացիների  մեջ սերմանում են տարատեսակ դավադրության տեսություններ, դրանով իսկ խրախուսում են վարակի տարածումը հանրապետությունում`  առաջ բերելով հումանիտար աղետի վտանգ երկրում:

Այն, որ դավադրության տեսություններն իրոք որ լուրջ ազդում են մարդկանց գիտակցության վրա անհերքելի փաստ է: Ավելին` այլ երկրներում էլ կան նման մարդիկ, ովքեր չեն հավատում կորոնավիրուսի գոյությանը, սակայն այլ երկրներում նման մարդկանց քանակը 10-15 տոկոսից այն կողմ չի անցնում: Մեզ մոտ`  Հայաստանում,  այդ մարդկանց քանակը 30 տոկոսից էլ բարձր է, սակայն այս երևույթի դեմ քրեական օրենսգրքով պայքարելը կատարյալ անմեխսունակություն է:

Սա իշխանության անճարությունից է գալիս: Այս իշխանությունները լիովին տապալել են  վարակի դեմ պայքարը: Այդ տապալման պատճառները բազմաբնույթ են:

Վերադառնանք Բաբաջանյանի առաջարկին: Իրականում Բաբաջանյանը սույն առաջարկով փորձում էր քծնել իշխանությանը, սակայն հիպոթետիկ, եթե պատկերացնեինք, որ նման տարբերակը հնարավոր կլիներ կյանքի կոչել, ապա առաջինը պիտի քրեական պատասխանատվության ենթարկվեր հենց Փաշինյանը: Նա էր, որ չհավատալով կորոնավիրուսի վտանգին, գավառական կարծիք էր հայտնում «կորոնավիրուսը ում շունն է» թեմայով: Ավելին` նա սկսեց իր նախընտրական արշավը հանրաքվեի շրջանակներում: Դրանով իսկ կոնկրետ մարդկանց մեսիջ հղելով, որ այս վարակին լուրջ պետք չէ վերաբերվել: Իսկ հանրահավաքներից մեկի ժամանակ, հեգնական տոնով նշում էր նույնիսկ, որ «...այս վիրուսը հատ -հատ,  պինցետով կհանենք ու արաղով կչեզոքացնենք...»:

Կարծում ենք, որ Փաշինյանի այս տեսակետները բավարար կլինեին, նրա հանդեպ քրեական գործ հարուցելու համար, եթե իհարկե Բաբաջանյանի առաջարկը ընդունվեր:

Բաբաջանյանի և նման գործիչները առաջարկները ցցուն են դարձնում այս իշխանության անլրջության և անճարակության աստիճանը:

Դրանով իսկ մարդկանց աչքերը սկսվում է բացվել, և նրանք տեսնում են, թե ում են իրականում հավատացել:

Սակայն ամեն մի ժողովուրդ պիտի վճարի իր կատարած սխալների համար, հակառակ դեպքում, համաշխարհային առաջընթաց չէր լինի:

Պարզապես զարմանալի է, թե ինչպես է ստացվում, որ հայ ժողովուրդն արդեն որերորդ անգամ սխալվում է իր ընտրության մեջ:

Այսօր կորոնավիրուսի դեմ պայքարում մենք Անդրկովկասում ունենք ամենավատ ցուցանիշը:

Իսկ դրա պատճառը, ոչ թե քաղաքացիների գիտակցությունն է, այլ այս իշխանության կողմից վարած պրիմիտիվ և իրարամերժ քաղաքականությունը, որի արդյունքում էլ մարդիկ սկսում  են չհավատալ այս իշխանություններին և,  որպես հետևանք, այդ անվստահությունն տարածվում է նաև վիրուսի վրա:

Սա է իրականությունը:

Դավիթ Մկրտչյան