Եթե մարդիկ չեն հավատում կորոնավիրուսի վտանգին, նշանակում է չեն հավատում նաև Փաշինյանին

Քիչ առաջ Խորհրդարանն առաջին ընթերցմամբ հավանության արժանացրեց բաց տարածքներում դիմակ չունենալու դեպքում անձանց 10 000 դրամ տուգանելու նախագիծը։ Որոշումն ընդունվեց 92 կողմ, 0 դեմ ձայների հարաբերակցությամբ:

«Վարչական իրավախախտումների վերաբերյալ» ՀՀ օրենսգրքում փոփոխություններ և լրացումներ կատարելու մասին նախագծի երկրորդ ընթերցումը ևս կկազմակերպվի այսօր, որից հետո նախագիծը կընդունվի երկրորդ ընթերցմամբ և ամբողջությամբ։ Հիշեցնենք, որ ըստ պարետի որոշման, բաց տարածքներում դիմակ կրելը պարտադիր չէ, սակայն պարտադիր է անձի մոտ դիմակի առկայությունը:

Իշխող ուժի ներկայացուցիչները սույն որոշումը ներկայացրեցին` որպես «լավություն» քաղաքացիների համար, քանզի նախկինում տուգանքի չափը կազմում էր 100 000 դրամ:

Սակայն  կառավարության սույն քայլի իրական դրդապատճառը անկեղծորեն ներկայացրեց ԱԺ նախագահ Արարատ Միրզոյանը: Վերջինս նախ նշեց, որ իր համար էլ է անսպասելի եղել արտահերթ նիստի հրավիրումը գործադիրի կողմից,  մյուս կողմից նա կարծիք հայտնեց, որ սույն որոշումով կառավարությունն մտադրվել է 10 հազար դրամ տուգանքները զանգվածային ձևով կիրառել, որպեսզի քաղաքացիները վերջապես հետևեն դիմակ կրելու պահանջին:

Միրզոյանն մի կողմից ցույց էր տալիս, որ ինքն անձամբ կապ չունի այս որոշման հետ  կարծես փորձելով տարանջատվել գործադիրի քայլերից, մյուս կողմից նա աջակցեց որոշումը առողջապահական խնդիրներով պատճառաբանելով:

Քննարկումների ընթացքում ԲՀԿ-ի ներկայացուցիչները փորձում էին բարձրացնել դիմակների գնագոյացման խնդիրները` նշելով, որ շարքային քաղաքացու համար դժվար կլինի դիմակներ գնելը ներկայիս բարձր գներով: «Իմքայլականներն» իրենց հերթին դիմակների գները բացատրում էին շուկայական առաջարկ-պահանջարկ տրամաբանությամբ: ԲՀԿ-ից Միքայել Մելքումյանը վիճարկեց այդ մոտեցումը, նշելով, որ,  երբ քաղաքացին պարտադրված է կրել դիմակներ, ապա այդ դեպքում շուկայական տրամաբանությունն այստեղ չպիտի գործի: Հետաքրքիր էր, որ այդ վեճում ԱԺ նախագահն աջակցեց ԲՀԿ-ականների մոտեցումը` կարծես ցանկանալով ցույց տալ, որ գործադիրի այս մոտեցման հետ ինքն այդքան էլ համաձայն չէ:

Անկախ ամեն ինչից այս որոշումով իշխանությունները փորձելու են լայնորեն տնտեսական և վարչական «մտրակ» կիրառել այն քաղաքացիների վրա, ովքեր չեն ենթարկվի այս որոշման հետ:

Ակնհայտ է, որ իշխանությունն տապալել է իր հակաճգնաժամային քաղաքականությունը և այն աստիճանի, որ քաղաքացիների մի զգալի մասը չի հավատում նույնիսկ այս վիրուսի իրական լինելու մեջ:

 Ի՞նչ է  ստացվում է, որ «մեծ վստահություն ունեցող Փաշինյանին մարդիկ չե՞ն հավատում կորոնավիրուսի հարցում»:

Եվ դրա համա՞ր է կառավարությունն որոշել լայնորեն կիրառել տուգանքների ինստիտուտը: Իսկ դա ցցուն չի՞ դարձնում արդյոք, որ  մարդիկ չվստահելով օրը մեջ իր տեսակետը փոխող Փաշինյանին, արդյունքում նրանք սկսում են չհավատալ նաև կորոնավիրուսի գոյությանը:

Ինչպե՞ս  ստացվեց, որ վիրուսի հարցում մենք ունենք 6-7 անգամ ավելի վատթար պատկեր, քան հարևան Վրաստանը, որ ստիպված ենք դիմել այսպիսի քայլերի: Այս ամենը ցույց է տալիս, որ այս իշխանության գործնեության էֆեկտիվությունը 6-7 անգամ ավելի ցածր է վրացականից:

Իսկ այդ ամենի հետևանքները պիտի կրի Հայաստանի քաղաքացիները, այդ թվում նաև նրանք, ովքեր զոմբիի մակարդակով մինչև վերջին ժամանակներն աջակցում էին այս իշխանությանը:

Սա է իրականությունը:

Արտակ Հակոբյան