Սպորտի նախարարությունում այսօր հյուրընկալվել են կույրերի միջազգային ֆեդերացիայի ներկայացուցիչները

ՀՀ սպորտի և երիտասարդության հարցերի նախարարի տեղակալ Գաբրիել Ղազարյանն ընդունել է կույրերի միջազգային ֆեդերացիայի (IBSA) նախագահ Ուրկ Ֆիսթերերին և ծրագրերի համակարգող Դեյվիդ Ստիրթոնին, որոնք մեր երկրում են գտնվում կույրերի ֆուտբոլը զարգացնելու նպատակով: Հյուրերին ուղեկցում էր Հայաստանի ազգային պարալիմպիկ կոմիտեի նախագահ Հակոբ Աբրահամյանը:

Գ. Ղազարյանը ողջունել է հյուրերին և տեղակացրել, որ հաշմանդամային սպորտը գտնվում է ՀՀ կառավարության ուշադրության կենտրոնում, և յուրաքանչյուր տարի պետական միջոցներից գումար է հատկացվում հաշմանդամային սպորտի զարգացման համար: «Մենք սերտորեն համագործակցում ենք Հայաստանի ազգային պարալիմպիկ կոմիտեի հետ, որն էլ, համագործակցելով IBSA-ի հետ, հուսով եմ՝ մեզ կառաջարկի ձեր մարզաձևի զարգացման ծրագրերը, որոնք էլ կփորձենք համատեղ ուժերով կյանքի կոչել»,- ասել է նախարարի տեղակալը: Նա նաև տեղեկացրել է, որ հաշմանդամություն ունեցող հայ մարզիկներն ավելի շատ հաջողություններ են գրանցում մենապայքարային մարզաձևերում: «Սակայն ֆուտբոլը՝ որպես ամենամասսայական մարզաձև, հնարավորություն կտա ավելի մեծ թվով մարզիկների զբաղվել սպորտով և հասնել մարզական հաջողությունների»,- ավելացրել է Գ. Ղազարյանը:

IBSA-ի նախագահ Ուրկ Ֆիսթերերը, որը շուրջ 40 տարի զբաղվում է այս մարզաձևի հարցերով, տեղեկացրել է, որ 2004 թվականից կույրերի ֆուտբոլը պարալիմպիկ մարզաձև է: «Հայաստանում կույրերի ֆուտբոլը զարգանալու հնարավորություն ունի, իսկ մենք պատրաստ ենք ցուցաբերել ինչպես փորձագիտական և մեթոդական, այնպես էլ գույքային աջակցություն»,- ասել է նա: