ԵՄ-ն զբաղվում է ընտրություններին տեսախցիկների տեղադրման հարցով (տեսանյութ)

2016թ. ՀՀ-ԵՄ հարաբերությունների լավ տարի բնորոշեց ՀՀ-ում ԵՄ պատվիրակության ղեկավար, դեսպան Պյոտր Սվիտալսկին: Լրագրողների հետ հանդիպմանն այսօր նա նաեւ նշեց, որ անցած տարվա ընթացքում ինտենսիվ քաղաքական երկխոսություն եղավ. «ԵՄ-ՀՀ շրջանակային համաձայնագրի քննարկման վեց փուլ տեղի ունեցավ: Շրջանակային համաձայնագիրը վերաբերում էր հիմնականում քաղաքական հատվածին, որից բացի առեւտրային հարցերի վերաբերյալ բանակցություններ եղան: Հույս ունենք, որ 2017թ. Շրջանակային համաձայնագիրը իրականություն կդառնա, հեռանկարը բավականին լավատեսական է. բանագնացները շատ մոտ են համաձայնագրի կնքմանը»: Հաղորդում է «Ա1+»-ը:

Անցնող տարին նա գնահատեց բացառիկ. «Մենք նոր ռեկորդ սահմանեցինք Բրյուսելից ՀՀ փոխանցված դրամական միջոցների առումով՝ շուրջ 62 մլն եվրո աջակցություն, որից մասնավորապես 7 մլն եվրոն հատկացվել է հաջորդ ընտրությունների նախապատրաստման համար»:

2017թ. ԵՄ համար գերակա ուղղությունը լինելու է ՀՀ ԱԺ ապրիլի 2-ի ընտրությունները, որը Պյոտր Սվիտալսկիի խոսքերով, իրենց ուշադրության կիզակետում են գտնվելու: Ինչպես նաեւ՝ բիզնես միջավայրի բարելավմանն է ուղղված լինելու ԵՄ աշխատանքները:

Ինչ վերաբերում է ԱԺ ընտրություններին իշխանություն-ընդդիմություն 4+4+4 ձեւաչափով ձեռք բերված պայմանավորվածությունների կատարմանը, մասնավորապես՝ ընտրատեղամասերում տեսախցիկների տեղադրմանը, ապա պարոն Սվիտալսկին նշեց, որ այս բարդ աշխատանքը պետք է իրականացվի բավականին կարճ ժամանակահատվածում. «2016թ. ամենամեծ ձեռքբերումը համարում եմ նույնականացման սարքավորումները, որոնք հնարավոր եղավ ունենալ ՄԱԿ-ի շնորհիվ: Ինչ վերաբերում է տեսախցիկներին, ապա մրցույթին մասնակից հայտատուն առաջարկել է պահանջկոտ պարամետրերի դիմաց գին, մինչդեռ այդ պարամետրերը չափազանց մեծ են՝ առկա ֆինանսավորումը հաշվի առնելով: Ես չափավոր լավատես եմ, որ լուծում կգտնվի, որը ընդունելի կլինի բոլորի համար: Մենք կոչ կանենք, որ խելամիտ կոմպրոմիս գտնվի: Մենք արդեն իսկ գիտենք, որ լուծումը 100 տոկոսանոց, կատարյալ չի լինի, որ ամեն ինչ արված է, որ որեւէ սողանցք չմնա: Մեր տեսանկյունից, ամեն դեպքում, պետք է գնալ դրա իրագործմանը, անգամ, եթե այն կատարյալ չէ»:

Մինչ այս պահը տեսախցիկների տեղադրման մրցույթին որեւէ մասնակից չի գրանցվել, մինչդեռ պարոն դեսպանը խոսում է հայտատուի պահանջների մասին: Մեր այն հարցին, թե ինչպիսի՞ պահանջկոտ պարամետրեր է ներկայացրել հայտատուն, ո՞ր ընկերությունն է այն եւ արդյոք ճիշտ են լուրերը, որ տեսախցիկների ձեռքբերմանը խոչընդոտում է իշխանություններից կողմից պահանջված ԱԱՀ վճարը, Պյոտր Սվիտալսկին պատասխանեց. «Շատ ինտենսիվ քննարկումներ են իրականացվել վերջին օրերին այս թեմաներով, անգամ ԱԺ 3 հանձնաժողով մինչեւ ուշ ժամեր աշխատում էին՝ քննարկելով բոլոր հնարավոր տարբերակները: Հաշվի առնելով ժամանակի սղությունը՝ պետք է որոշման հանգել մոտակա ժամերի, օրերի ընթացքում. մինչեւ շաբաթվա վերջ պարզ կլինի՝ ինչն է իրագործելի կամ այդ ամենը իրագործելի՞ է, թե ոչ: Ինչ վերաբերում է ԱԱՀ-ին, ապա Կառավարությունն այս հարցում ունի կառուցողական մոտեցում, ինչպես նաեւ՝ ԵՄ-ն ՀՀ հետ ունի համաձայնագիր, որով մեր բոլոր ծրագրերն ազատված են ԱԱՀ-ից»:

Մանրամասները՝ «Ա1+»-ի տեսանյութում:

Լուսանկարը՝ Ֆոտոլուրի