Freedom House. Հայաստանը` կիսակոնսոլիդացված ավտորիտար ռեժիմ ունեցող պետություն

Միջազգային «Freedom House» իրավապաշտպան կազմակերպությունը հրապարակել է 2019թ. վերաբերող զեկույցը, որը վերնագրվել է «Պետությունները անցումային փուլում. Դեն նետելով ժողովրդավարության դիմակը» («Nations in Transit. Dropping the Democratic Facade»): Զեկույցը բաղկացած է երկու հատվածից՝ «Nations in Transit» և «Democracy in the World»:

Զեկույցի համաձայն՝ Հայաստանը նախկինի պես մնում է կիսահամախմբված ավտորիտար ռեժիմով պետություն:

Զեկույցի հեղինակները ուշադրություն են դարձրել Հայաստանում եւ Ուկրաինայում երկու տարվա ընթացքում վերափոխումներին։

«Հայաստանի վարչապետ Նիկոլ Փաշինյանը եւ Ուկրաինայի նախագահ Վլադիմիր Զելենսկին այժմ կբախվեն հույսերն արադարացնելու, վստահությունը պահպանելու եւ առանց ժողովրդավարական նորմերը խախտելու կոռումպացված համակարգերի վերակազմավորման բարդ խնդրի հետ»,- ասվում է զեկույցում։

Զեկույցում հեղինակները նաեւ անդրադարձել են Ամուլսարի ոսկու հանքի շահագործման հարցին։

Ըստ հեղինակների՝ այդ հարցը «գլխացավանք է դարձել վարչապետ Նիկոլ Փաշինյանի համար», ով նախագիծը ժառանգել է կոռումպացված վարչակազմից, որը տապալվեց 2018թ․ ժողովրդական ցույցերի ժամանակ։

«Ակտիվիստները մի քանի ամսվա ընթացքում արգելափակում էին դեպի հանքավայր տանող ճանապարհները։ Նրանց խոսքերով՝ եթե Փաշինյանը հավանություն տա այս նախագծին, ապա կապացուցի, որ ոչնչով չի տարբերվում այն ղեկավարներից, ում նա փոխարինել է»,- հավելում են զեկույցի հեղինակները։