Տնտեսական այս պայմաններում տասնյակ հազարավոր աշխատատեղեր ապահովող կոնցեռնի տնօրենին կալանավորելը դուրս է տրամաբանական սահմաններից. Ի. Տոնոյանը՝ Սեդրակ Առուստամյանի կալանավորման մասին. Տեսանյութ

ԱԺ «Բարգավաճ Հայաստան» խմբակցության պատգամավոր Իվետա Տոնոյանը, Tert.am-ի հետ զրույցում անդրադառնալով հարցին, թե ինչ ասելիք ունի ԲՀԿ-ն Սեդրակ Առուստամյանին առաջադրված մեղադրանքի և նրան կալանավորելու որոշման մասին, ասաց, որ հարցը «Բարգավաճ Հայաստան» խմբակցությանն ուղղելը այսպես ձևակերպային առումով սխալ է, որովհետև Սեդրակ Առուստամյանը «Մուլտի գրուպ կոնցեռնի» գլխավոր տնօրենն է, որտեղ հավատարմագրային կառավարման են հանձնված այն ընկերությունները, որտեղ Գագիկ Ծառուկյանը բաժնեմաս ունի: Նա նաև նշեց, որ իրենք երբևէ տնտեսական ոլորտը քաղաքականության հետ փոխկապակցելու և շաղկապելու ցանկություն և մտադրություն չեն ունեցել:

Իվետա Տոնոյանը նշեց, որ, բնականաբար, մեղադրանքի մասին տեղյակ են: «Քանի որ գործը գտնվում է նախաքննության փուլում, գնահատականներ կամ մեկնաբանություններ առանձնապես չեմ հնչեցնի: Կասեմ որ իրավական հարթությունում է հարցը գտնվում և հույս ունեմ, որ ազնիվ և արդար նախաքննություն է ընթանալու և որևէ ենթատեքստային գործողություններ չեն իրականացվելու»,- ասաց նա:

Պատգամավորնը, այդուհանդերձ, հնչեցրեց իր անձնական կարծիքը Սեդրակ Առուստամյանի կալանավորման վերաբերյալ: «Խոշորագույն կոնցեռնի տնօրենին կալանավորելու որոշում կայացնելուց առաջ շատ լավ կլիներ, որ նույն այդ որոշում կայացնողները մեկ րոպե մտածեին, որ այդ կոնցեռնը, որի կազմում շուրջ 30 ընկերություններ են ներգրավված և համագումարի տեսքով եթե անդրադառնալու լինենք վճարած հարկերի քանակին, ապա խոշորագույն հարկ վճարողների առաջին տասնյակում է տեղավորվում «Մուլտի գրուպ կոնցեռնը», ուստի տնտեսական այս պայմաններում, երբ երկիրը գտնվում է արտակարգ դրության պայամաններում, իսկ կոնցեռն էլ տասնյակ հազարավոր աշխատատեղեր է ապահովում, դրա տնօրենին կալանավորելու որոշումն ինձ համար որոշակի տրամաբանական սահամններից դուրս է»,- ընդգծեց նա:

Հարցին՝ Գագիկ Ծառուկայնի դեմ ուղղված սլաքներ չի՞ տեսնում, նա նշեց, որ չի ուզում հավատալ, որ նորօրյա Հայաստանում հնարվոր են նմանատիպ գործընթացներ:

Մանրամասները՝ Tert.am-ի տեսանյութում