Մամեդյարովը հաստատեց Լավրովի խոսքերը և կոչ արեց Հայաստանի իշխանություններին՝ չխաբել սեփական ժողովուրդին

Այսօր Ադրբեջանի ԱԳ նախարար Էլմար Մամեդյարովը հարցազրույց է տվել ադրբեջանական ԶԼՄ-ներից մեկին` նշելով, որ Լավրովի խոսքերն այն մասին, որ բանակցային գործընթացում այսօր հիմնականում քննարկվում է «տարածքների վերադարձը», համապատասխանում է իրականությանը: Այլ խնդիր է, որ ըստ նրա, հայկական կողմը թաքցնում է սույն փաստը հայ հասարակությունից` վախենալով, որ այդ դեպքում Հայաստանի իշխանության վարկանիշը կարող է տուժվել: Սակայն, ըստ Մամեդյարովի, ներկայիս հայաստանյան իշխանությունները, պետք է «պատրաստեն»  սեփական ժողովորդին խաղաղության, հակառակ դեպքում, «Ադրբեջանը իրավունք կունենա սեփական ուժերով վերականգնել իր տարածքային ամբողջականությունը»: Մամեդյարովը այս վերջին միտքը նշել է, որպեսզի պաշտպանվի այն մեղանդրանքներից, որ վերջին ժամանակահատվածում հնչում են իր հասցեին Ադրբեջանում: Ըստ այդ մեղադրանքների, հենց Մամեդյարովն է դարձել այն գլխավոր խոչընդոտը, որ Ադրբեջանը չի գնում խնդրի ռազմական լուծման: Այդ մեղադրանքին ի պատասխան Մամեդյարովը, փաստացի, պատասխանում է հետևյալ ձևով: «Այդ իրավունքը դիավանագիտական ճակատում իմ շնորհիվ արդեն ստացել ենք, բայց գերադասելի կլինի, որ խնդիրը լուծվի առանց ռազմական գործողությունների»:

Այսինքն, Մամեդյարովի  հարցազրույցը յուրօրինակ հաշվետվություն է իր կատարած գործի համար, ըստ որի, վերջին երկու տարվա ընթացքում ադրբեջանական կողմին հաջողվել է ցույց տալ հայկական կողմի «ոչ կոնստրուկտիվ» լինելը:

Մամեդյարովը փաստացի նշում է, որ ինքն այս վերջին երկու տարվա ընթացքում դիվանագիտական ճակատում վաստակել է Ադրբեջանի համար նաև «ռազմական միջոցով լուծելու» տարբերակը, սակայն ինքն՝ Մամեդյարովը, կողմ է, որ միջնորդների ճնշման միջոցով, առանց պատերազմի ստիպել Հայաստանին՝ գնալ միակողմանի զիջումների:

Այդ առումով, իհարկե, կարելի է «շնորհավորել» Մամեդյարովին իր կատարած գործի համար: Թեև այստեղ ավելի մեծ էր Նիկոլ Փաշինյանի «լուման», որի արդյունքում Հայաստանը դիվանագիտական ճակատում խայտառակ պարտություն է կրել Ադրբեջանից, և որի պատճառով էլ Ադրբեջանը «քարտ բլանշ է» ստացել պատերազմ սկսելու համար:

Այս ամենի գլխավոր տուժողը լինելու է հայ ժողովուրդը, սակայն մյուս կողմից ամեն մի ժողովուրդ արժանի է այն ղեկավարին, որին ընտրել է, և այդ իմաստով, այն կորուստները, որոնց առջև կանգնած է լինելու հայ ժողովուրդը, օբյեկտիվ բնույթ են կրելու: Քանզի ինչպես հասարակ կյանքում մարդը պատժվում է իր ախմախ քայլերի համար, այդպես էլ ժողովուրդը պիտի պատժվի իր կոլեկտիվ սխալ որոշումների համար: Այդպիսին է բոլոր ժողովուրդների պատմության գնահատման օրինաչափությունը:

Սա է իրականությունը:

Դավիթ Մկրտչյան