Սամվել Բաբայանի ձերբակալությամբ բացահայտվեցին մի շարք «ԿԳԲ»-ական լրատվամիջոցներ

Երեկ սենսացիա էր ոչ միայն Բաբայան Սամվելի ձերբակալությունը, այլև այն, թե ինչպես այդ ձերբակալության ընթացքում իշխանությունը բացահայտեց իր ողջ լրատվական-գործակալական ցանցը: Սկսենք նրանից, որ Ջրառատի դեպքերից անմիջապես հետո Ազգային անվտանգության խողովակներով Սամվել Բաբայանի դեմ ակտիվ հակաքարոզչություն սկսեցին «Ժամանակ» օրաթերթն ու «1in.am» կայքը:

Բերիա-Եժովյան մեթոդով իրեն «արևմտամետ» հորջորջող Արման Բաբաջանյանը բառիս բուն իմաստով «գործ էր կարում» Սամվել Բաբայանի վրա, թե իբր Ջրառատի դեպքերը կազմակերպել է հենց ինքը՝ Սամվել Բաբայանը, իսկ նպատակը մեկն էր՝ Սերժ Սարգսյանն արդեն որոշում էր կայացրել ձերբակալել Սամվել Բաբայանին, և նրան անհրաժեշտ էր, որ իր վերահսկողության տակ գտնվող «ստուկաչական» լրատվամիջոցները համապարտասխան ֆոն ապահովեին իր սպեցօպերացիայի համար:

«Ժամանակ» թերթի վերջին գրառումը հենց մարտի 22-ի առավոտյան էր, երբ նշվում էր, թե իբր ինչ-որ մի գործ է բացահայտվել և շուտով Սամվել Բաբայանին կձերբակալեն: Ժամեր անց նրան բերման ենթարկեցին:

Զարմանալիորեն, նույն ձերբակալման պահին՝ որպես ականատես¸ եղավ «168ժամ»-ի թղթակիցը: Էլ ո՞վ բախտ կունենար այդ սենսացիոն պահը բաց չթողներ, եթե ոչ այդ լրատվագործիքը: Ընդամենը մեկ ժամ անց ձերբակալությունից հետո ԱԱԾ-ն հրապարակեց մի տեղեկատվություն, որ մաքսանենգ ճանապարհով Հայաստան «Իգլա» տեսակի զենք է տեղափոխվել և կան ձերբակալվածներ: Եվ վերջապես, ձերբակալման մասին առաջինը լուրը տարածեց «Հրապարակ» օրաթերթը՝ հավանաբար իր հին և ավանդական կապերի միջոցով: Բաղրամյան 26-ի մեր աղբյուրները փոխանցում են, որ վերևից ցուցում է տրված բոլոր լրատվամիջոցներին անպայման տարածել «Ժամանակ» թերթի բոլոր ԱԱԾ-ական տեղեկությունները, և վերջիններս պատշաճ մակարդակով կատարում են Բաղրամյան 26-ի հրահանգը: Այս ամենից հետո պարզապես նողկալի և զզվելի է տեսնել, թե ինչպես են այս լրատվագործիքները ծառայում այսօրվա քրեաօլիգարխիկ համակարգին, որի հետևությունը պետք է անի հասարակությունը:

Դավիթ Մկրտչյան