Նիկոլ Փաշինյանը ձախողել է հարաբերությունները թե՛ Արևմուտքի, թե՛ Ռուսաստանի հետ. Շանթ Հարությունյան. Տեսանյութ

Հայկական կողմն ասում է, որ բանակցային սեղանին ոչ մի փաստաթուղթ չկա։ Կա դիտարկում, որ Նիկոլը խաբել է, բայց ես էլ ուզում եմ դիմել հոգեբաններին, որպեսզի իրենք հստակեցնեն՝ Նիկոլն ադեկվա՞դ է, թե՞ ոչ։ Այս մասին Անժելա Թովմասյանի՝ Արմնյուզ ՀԸ «Հայելու առաջ» հեղինակային հաղորդման ժամանակ ասել «Ցեղակրոն» կուսակցության նախագահ Շանթ Հարությունյանը՝ անդրադառնալով ՌԴ ԱԳ նախարար Սերգեյ Լավրովի հայտարարությանը։

Ըստ Շանթ Հարությունյանի՝ տպավորություն է, որ Նիկոլ Փաշինյանը գնում է բանակցությունների՝ չհասկանալով բանակցություններն ինչ են․ «Նիկոլ Փաշինյանն ասում էր՝ մենք Ալիևի հետ զրուցում ենք, չենք բանակցում։ Դե Լավրովի նման «հարց լուծողներն էլ» ասում են՝ եղավ Նիկոլ ջան, դու զրուցի, վերջում էլ թուղթը կստորագրես»։

Շանթ Հարությունյանի համոզմամբ՝ տարածաշրջանում ստատուս-քվոն կպահպանվի այնքան ժամանակ, քանի դեռ Ռուսաստանը չլուծված հարցեր ունի Ալիևի հետ։

Հարցին՝ ինչո՞ւ հենց այս փուլում Լավրովը նման հայտարարություն արեց՝ խոսելով այդ թվում նաև գազի գնի թանկացման մասին, այստեղ արդյոք կապ կա՞ ՀՀ երկրորդ նախագահ Ռոբերտ Քոչարյանին կալանքի տակ պահելու հետ, Շանթ Հարությունյանը պատասխանել է․ «Կայսրության ղեկավարները երբեք ընկերության շահերով չեն առաջնորդվում։ Պուտինն առաջնորդվում է բացառապես կայսրության շահերով»։

Ըստ Շանթ Հարությունյանի՝ այս իշխանությունը, մասնավորապես Նիկոլ Փաշինյանը թշնամիներին ճանաչելու խնդիր ունի:

Խոսելով վերջին երկու տարում Հայաստանի վարած ներքին ու արտաքին քաղաքականության մասին՝ Հարությոյւնյանն ասել է. «Սերժ Սարգսյանը կարողանում էր Արևմուտքի հետ լեզու գտնել, Ռոբերտ Քոչարյանը ռուսների հետ էր «ախպերություն» անում, բայց Նիկոլ Փաշինյանը երկու կողմում էլ ձախողել է հարաբերությունները»:

Հարցին՝ ի վերջո այս իշխանությունն անցնող երկու տարում ի՞նչ է արել, ինչի՞ է հասել, Շանթ Հարությունյանը պատասխանել է. «Ես, իսկապես, չգիտեմ Նիկոլ Փաշինյանն ինչ է անում, բայց գիտեմ մի բան՝ ասել է, որ սրան-նրան դատելու է, դա էլ անում է»: