«Այս պահին բանակցային սեղանին դրված է հակամարտության կարգավորման փուլային տարբերակը». Լավրով. Տեսանյութ

ՌԴ արտգործնախարար Սերգեյ Լավրովը «Ա. Գորչակովի անվան հանրային դիվանագիտության աջակցության» հիմնադրամի հրավիրած կլոր սեղանին հայտարարել է, որ ներկայում սեղանին դրված է փաստաթուղթ, որը ենթադրում է ղարաբաղյան հակամարտության կարգավորման փուլային լուծում:

Նա հիշեցրել է, որ գոյություն ունեն Մադրիդյան պայմանավորվածություն, ինչպես նաև այսպես կոչված Կազանյան սկզբունքները, որոնք առաջարկել է ռուսական կողմը 2010-2011 թթ., և մեկ տարի առաջ Մոսկվայում Հայաստանի և Ադրբեջանի նախարարների հանդիպման ժամանակ շրջանառության մեջ դրված նախագծերը, որոնք ներկայում ակտիվ քննարկվում են:

«Այդ փաստաթղթերը ենթադրում են կարգավորում փուլային մոտեցման հիման վրա, ենթադրելով առաջին փուլում առավել արդիական հարցերի լուծում, Լեռնային Ղարաբաղի շուրջ մի շարք շրջանների ազատում և տրանսպորտային, տնտեսական և այլ հաղորդակցությունների ապաշրջափակում: Այնպես որ ես վստահ եմ, երբ մենք կգանք որոշմանը՝ ստորագրել այդ փաստաթղթերը, դա կլինի կարևոր քայլ ՄԱԿ-ի Անվտանգության խորհրդի բանաձևերի իրագործման հարցում, որոնք պահանջում էին դադարեցնել պատերազմը և սկսել բանակցել: Այժմ պետք է պայմանավորվել, հենց դա էլ անում ենք ԵԱՀԿ Մինսկի խմբի համանախագահներս», - ասաց նա:

Նա հիշեցրեց նաև ղարաբաղյան հակամարտության կարգավորման ձևաչափը, որը ներառում է պաշտոնական Երևանն ու Բաքուն, ինչպես նաև ԵԱՀԿ Մինսկի խմբի եռանախագահներին և ԵԱՀԿ գործող նախագահի անձնական ներկայացուցչին:

Դիտել՝ 58:00 րոպեից

Zham.am