Շատ քիչ թվով ուսանողներ կօգտվեն այս ծրագրից. ԵՊՀ ուսխորհրդի նախագահ

Մենք առաջարկել ենք, որ վարչապետը բոլոր ուսանողներին փոխհատուցում տրամադրի: Այս մասին NEWS.am-ի հետ զրույցում ասաց Երեւանի պետական համալսարանի ուսխորհրդի նախագահ Դավիթ Ափոյանը:

«Մեր պահանջը այն էր, որ վարչապետը պետք է բոլոր ուսանողներին փոխհատուցում տար։ Քանի որ ես ինքս էլ հասկանում եմ, որ ներկա իրավիճակում շատ դժվար է առանձնացնել այդ երկու կատեգորիաները՝ ովքեր են տուժել, ովքեր չեն տուժել, մենք առաջարկել ենք, որ բոլոր ուսանողները փոխհատուցում ստանան մոտ 50,000 դրամի չափով, որը շատ մեծ թիվ չի կազմում։ Եթե մենք հաշվենք, որ 7800 ուսանող է սովորում բակալավրի վճարովի համակարգում, եթե բոլորին 50000-ական դրամ փոխհատուցում տրամադրվի, ապա այդ գումարը կկազմի մոտ 450 միլիոն դրամ։ Հատկապես ինչու եմ այս առաջարկը անում, որովհետեւ եթե նայենք հարցին այն տեսանկյունից, որ կրթությունը այնքան էլ հավասար չի ապահովվել, այսինքն՝ հեռահար է կրթությունը եղել, որոշ դասախոսներ չեն կարողացել անցկացնել, իսկ բնականաբար առկա, ստացիոնար կրթությունը չես կարող համեմատել հեռահար կրթության հետ, այստեղ արդեն նաեւ կրթության որակն է տուժել։ Այս ամենը հաշվի առնելով, նաեւ ֆինանսական խնդիրները, կարծում եմ, որ ճիշտ կլինի, որ կիսամյակային ուսման վարձը գոնե 50,000 դրամով փոխհատուցվի բոլոր ուսանողներին»,- ասաց նա։

Դավիթ Ափոյանը նշեց, որ դեռ չի հաստատվել այս միջոցառումը, այն հայտարարության տեսքով է, ուստի կարծում է, որ իրենց առաջարկը նույնպես հաշվի կառնվի վերջնական որոշում կայացնելուց առաջ:

Իսկ եթե մնա նախնական տեսքով, ապա, ըստ ուսխորհրդի նախագահի, շատ քիչ թվով ուսանողներ կօգտվեն այս ծրագրից։

«Վարչապետի հայտարարության մեջ տեսնում ենք, որ օգնություն 90 ՄՈԳ ունեցող ուսանողներին է վերաբերում։ Դրանից բարձր ՄՈԳ ունեցող ուսանողները, եթե սովորում են ավարտական կուրսում, կստանան ամբողջական փոխհատուցում, իսկ եթե ոչ ավարտական կուրսում, ուրեմն 75 տոկոս փոխհատուցում կստանան։ Այստեղ հարց է առաջանում՝ եթե 100 բալանոց համակարգում 90-ն է սահմանված շեմը, ապա 20 բալանոց համակարգում քանի՞սը կլինի։ Եթե պարզ մաթեմատիկական հաշվարկով նայենք, ապա կտեսնենք, որ շեմը 18-ն է, բայց որոշ բուհ-երի պաշտոնական փաստաթղթերում գնահատման կարգում տեսնում ենք որ 90-ը հավասարեցված է 19-ի։ Տվյալ պարագայում եթե մենք փորձում ենք համադրել 19 ՄՈԳ եւ ավելի առաջադիմություն ունեցող ունեցողների վճարովի, թե անվճար սովորելու պատկերը, կտեսնենք, որ մեծամասամբ այդ ուսանողները սովորում են անվճար համակարգում, իսկ ովքեր դուրս են մնացել այդ ռոտացիայից, նրանք ինչ-որ չափով օգտվում են բարեգործական հիմնադրամների աջակցություններից։ Սա հումանիտար թեւին է վերաբերում։ Իսկ բնագիտական թեւում կա՛մ չկան նման ուսանողներ, կա՛մ եթե կան՝ անպայման սովորում են անվճար։ Նույնիսկ ունենք ուսանողներ բնագիտական թեւում, որ 15-16 ՄՈԳ ունենալով անվճար են սովորում։ Արդյունքում ստացվում է մի պատկեր, որ նախ այս ծրագիրը մենք նպատակային չենք ծառայեցնում, որովհետեւ մեր նպատակը ոչ թե կրթությունը խրախուսելն է, ինչպես նշված է այս հայտարարության մեջ, այլ այն որ աջակցություն ստանան այն ուսանողները, ովքեր ունեն դրա կարիքը, ովքեր տուժել են, չեն կարող վճարել իրենց վարձը։ Ճիշտ է՝ այս ընտրված խմբի մեջ նույնպես կգտնվեն նման ուսանողներ, բայց լայն վերցված՝ մենք թիրախը սխալ ենք ընտրել, իմ խորին համոզմամբ»,- ընդգծեց նա:

Նշենք, որ օրերս Կառավարությունը հայտարարել էր կորոնավիրուսի հետեւանքները մեղմացնելու 14-րդ միջոցառման մասին, որով նախատեսվում էր օժանդակություն ցուցաբերել ուսանողներին: