Ամբոխավարական տրամաբանությամբ չի կարելի մոտենալ հայոց եկեղեցուն, այն մեր կարևորագույն սյուներից մեկն է, անընդունելի է նսեմացնելը և պախարակելն այն. Եգիպտոսի Հայ դատի մարմնի ատենապետ

Եգիպտոսի Հայ դատի մարմնի ատենապետ Արմեն Մազլումյանը Tert.am-ի հետ զրույցում նշեց, որ ընդհանրապես դեմ է քաղաքական հաշիվներ մաքրելուն և պատեհապաշտորեն ուրիշին զրպարտելուն, դատողություններին և վիրավորական արտահայտություններին, հատկապես, եթե դրանք վերաբերում են եկեղեցուն: Նա նման դիտարկում արեց`անդրադառնալով այս օրերին Ամենայն Հայոց Կաթողիկոս Գարեգին Բ-ին ուղղված՝ ՀՀ ներկայիս իշխանությունների մեղադրանքներին:

«Հայաստանյաց եկեղեցին մեր կարևորագույն սյուներից մեկն է և անընդունելի է ինչ-ինչ հաշիվների համար, առանց փաստերի, նսեմացնելը և պախարակելն այն»,- ասաց նա:

Հիշեցնենք, որ Ամենանայն հայոց կաթողիկոսը հայտարարել էր կալանավորների, այդ թվում՝ ՀՀ երկրորդ նախագահ Ռոբերտ Քոչարյանի խափանման միջոցը`հաշվի առնելով վերջինիս առողջական վիճակը:

Նա մասնավորապես հայտարարել էր. «Անսալով Ռոբերտ Քոչարյանի առողջության մասին բժիշկների կարծիքին՝ կարևոր ենք համարում, որ արդարադատության իրականացմանը զուգահեռ ձեռնարկվեն բոլոր կանխարգելիչ միջոցները, այդ թվում և խափանման միջոցի փոփոխումը՝ կանխելու կորոնավիրուսի պայմաններում նրա առողջական վիճակի հետագա վատթարացումը»:

Դրան հաջորդել էր ՀՀ իշխանությունների, մասնավորապես ԱԺ փոխնախագահ Ալեն Սիմոնյանի, «Իմ քայլը» խմբակցության պատգամավորների և այլ գործիչների գրառումներն՝ ուղղված Վեհափառին։

Արմեն Մազլումյանի խոսքով` ամբոխավարական տրամաբանությամբ չի կարելի մոտենալ հայոց եկեղեցուն: «Նրանք, որոնք սխալ են գործել, երկիր կողոպտել, խնդրեմ, թող հաշիվ տան դատարանում` օրենքի առջև և ոչ ընկերային ցանցերում»,- ասաց նա:

Նա մատնանշեց, որ մենք փոքր պետություն ենք` կիսապատերազմական իրավիճակում, իսկ երկրի անվտանգությունը առաջնահերթություն է: «Թույլատրելի չէ արդարություն պահանջել` շրջանցելով օրենք, դատարան և դատավոր. հետո քաոս կստեղծվի: Մենք ցանկանում ենք Հայաստանը տեսնել օրենքի գերակայությամբ, որպես ժողովրդավարական երկիր, որտեղ բոլորը հավասար են օրենքի առջև»,- ասաց նա