Ինչո՞ւ Արարատ Միրզոյանը որոշեց տարանջատվել Ալեն Սիմոնյանից

Այսօր ԱԺ նախագահը խոսելով Վեհափառի հորդորի մասին` կապված Ռոբերտ Քոչարյանի գործի հետ նշեց, որ Հայաստանում եկեղեցին ու պետություն իրարից տարանջատված են և մեկը մյուսի գործերի մեջ չպիտի խառնվեն: Այս ակնարկը կարող էր վերաբերվել և Վեհափառի, և Ալեն Սիմոնյանի արձագանքին: Հետաքրքիր է, որ հետո Միրզոյանը նշեց, որ Վեհափառը` որպես ՀՀ քաղաքացի, կարող է իր տեսակետն ունենալ այս կամ այն հարցի վերաբերյալ:

Իսկ ահա Ալեն Սիմոնյանի հայտարարության մասին նա նշեց բառացի հետևյալը,- «...Անհրաժեշտություն չեմ տեսնում լրացուցիչ որևէ բան ասել, ցանկացած նոր բառ կարող է նոր երանգ հաղորդել այս հայտարարություններին: Այդ պահին դա մեր պետության ու ազգի համար օգուտ չի լինի: Ասելիք իհարկե կա, վերաբերմունք իհարկե կա, բայց չեմ ուզում ասել: Ուղիղ ու անկեղծ ասում եմ...»:

Այսպիսով` Արարատ Միրզոյանը գերադասեց տարանջատվել Ալեն Սիմոնյանի բոլշևիկյան պահվածքից` ցույց տալով, որ ինքը կարող է ինքնուրույն տեսակետ ունենալ այս կամ այլ հարցի շուրջ: Բացի այդ Միրզոյանը իր այս պահվածքով ցույց տվեց, որ ոչ բոլոր իմքայլականներն են պատրաստ անվերապահ կատարել Փաշինյանի կապրիզները, և, որ Ալեն Սիմոնյանին  նմանները իշխանության մեջ այդքան էլ շատ չեն:

Խոսելով ՀՀ 3-րդ նախագահին դիմավորելու կարգին Միրզոյանն այստեղ էլ ցուցադրեց իր կորեկտությունը` նշելով, որ նախկին նախագահի մուտքն ԱԺ պատշաճ կատարվել է, նրան հնարավորություն է տրվել խորդարարան մտնել ԱԺ նախագահի համար նախատեսված առանձին մուտքով:

Թվում է, թե Միրզոյանի այս գնահատականների մեջ էական ոչինչ չկա: Սակայն, մարդկային պահվածքի իմաստով արդեն տեսանելի է, որ իշխանության մեջ բոլորը չէ, որ ուզում են Սիմոնյանի նման պահվածք ունենալ: Մանավանդ, որ կորոնավիրուսը ոչ հեռու ապագայում զգալի փոփոխություն է մտցնելու ամեն ինչ մեջ, և, հավանաբար, Արարատ Միրզոյանը զգալով այս իրավիճակը  չի ուզում վատ համբավով հիշվել հանրության մեջ:

Ո՞վ  գիտի, թե , օրինակ, 2-3 ամիս անց ի՞նչ վիճակ է առաջանալու երկրում: Հարցրեք Արսեն Թորոսյանին, նա շատ ավելի մատչելի ձևով կներկայացնի մեր մոտ ապագան:

Եվ այդ իմաստով Միրզոյանն ի տարբերություն Սիմոնյանի մտածում է նաև իր տեղի ու դերի մասին այդ ոչ հեռու ապագայում:

Սա է իրականությունը:

Արտակ Հակոբյան