Ախալքալաքում հնչել են կրակոցներ գործող պատգամավորի տան կողմից նախկին պատգամավորին պատկանող տարածքի ուղղությամբ

Ախալքալաքում կրակոցներ են հնչել: Tert.am-ի հետ զրույցում այս մասին հայտնեց տեղի բնակիչ Ս․ Ա-ն և տեղեկացրեց, որ կրակոցները հնչել են Վրաստանի խորհրդարանի պատգամավոր Հենզել Մկոյանի տան կողմից՝ խորհրդարանի նախկին պատգամավոր Սամվել Պետրոսյանին պատկանող տարածքի ուղղությամբ:

Հարցին, թե կան տուժածնե՞ր, թե ոչ, Tert.am-ի զրուցակիցն ասաց, որ այս պահին տեղեկություն չունի. «Մի քանի կրակոցներ են հնչել, այս պահին ամբողջ տարածքը փակ է, դեպքի վայր են ժամանել ոստիկաններ, իսկ քաղաքացիների մուտքն արգելվել է: Տեղյակ ենք, որ դեպքի վայրում են և՛ Հենզել Մկոյանն ու նրա հարազատները, և՛ Սամվել Պետրոսյանը։ Դեպքը տեղի է ունեցել մոտ երկու ժամ առաջ, մարդիկ մի փոքր վախեցած են, բայց արդեն ամեն ինչ կարծես՝ անվտանգ է, տեղում են ոստիկանները նաև այլ շրջաններից»:

Tert.am-ի զանգերին Հենզել Մկոյանը չպատասխանեց, իսկ Սամվել  Պետրոսյանի հեռախոսահամարին պատասխանող անձն ասաց, որ Սամվել Պետրոսյանն այս պահին զբաղված է և չի կարող հարցերին պատասխանել: Կրակոցների վերաբերյալ, բացի միջադեպից զրուցակիցն այլ մանրամասներ չհայտնեց:

Վրաստանի ներքին գործերի նախարարությունից Tert.am-ին հայտնեցին, որ հարուցվել է քրեական գործ և այս պահին այլ մանրամասներ չեն հայտնում։