Ո՞ւմ շահերն է ներկայացնում Արմեն Սարգսյանը և ինչո՞ւ նա որոշեց նվաստացնել Չինաստանի դեսպանին

Ինչպես հայտնի է, ԽՍՀՄ-ի ժամանակվա Միխայիլ Կալինինի կարգավիճակ ունեցող Արմեն Սարգսյանը Հայաստան կարճաժամկետ այցելությունների ընթացքում  երբեմն հանդիպումներ է ունենում նաև օտարերկրյա ներկայացուցիչների հետ: Մեծամասամբ այդ հանդիպումները ունենում են արարողակարգային բնույթ: Սակայն,  քանի որ արտասահմանցիները հարգում են մեր պետական ատրիբուտները,  այդ հանդիպումների ձևին ու կարգին լուրջ ուշադրություն են դարձնում:

Վերջերս Արմեն Սարգսյանը որոշեց հանդիպել մեր երկրում հավատարմագրված Չինաստանի  դեսպան Թյան էրլունի հետ: Չինաստանը կորոնավիրուսի հետ պայմանավորված հումանիտար օգնություն է տրամադրելու Հայաստանին: Սա Պեկինի ռազմավարությունն է աշխարhով մեկ: Չինաստանը այս իրավիճակից օգտվելով` փորձում է դիրքային առավելություններ ստանալ այդ օգնությունների միջոցով: Վերջերս էլ Չինաստանը այդպիսի օգնություն էր ուղարկել նաև Իտալիա:

Սակայն մեզ հետաքրքրում է այդ հանդիպումը այն մասով, որ Արմեն Սարգսյանը անսպասելիորեն որոշել էր Չինաստանի հետ հանդիպմանը թատերական ներկայացման ձև տալ: Նա «խնդրել էր»  դեսպանին հեռու նստել իրենից, որպեսզի, հավանաբար, նա «չվարակի» ՀՀ նախագահին: Ավելին, Արմեն Սարգսյանը այդ քայլով ոչ միայն նվաստացրել էր Չինաստանի դեսպանին, այլ նաև որոշել էր այս ամենը հրապարակայնացնել:

Ինչո՞ւ, կհարցնի շարքային մեր քաղաքացին: Հավանաբար, նա այդ քայլով ուզում էր ինչ- որ մեկին ցույց տալ, որ «չինացիները մինչ  օրս դեռ վտանգավոր վիրուսակիրներ են»:

Քանզի, օրինակ,   ՀՀ առողջապահության նախարար Արսեն Թորոսյանի հետ  Արմեն Սարգսյանը հանդիպել էր  առանց այդպիսի թատերական ներկայացման:

Փաստորեն ստացվում է, որ Թորոսյանը վիրուսակիր չէ, իսկ ահա չինացի դեսպանը կարող է պոտենցիալ վիրուսակիր լինել:

Սա Արմեն Սարգսյանի  քայլերի տրամաբանությունն է: Դժվար թե նա վախենար վարակվել չինացի դեսպանից: Իսկ ահա նրա այս ներկայացումը կարող էր դուր գալ, օրինակ,  ամերիկացիներին, որոնք  ինչպես հայտնի է տեղեկատվական պատերազմի մեջ են գտնվում Չինաստանի հետ: Ամերիկացիները կորոնավիրուսը ներկայացնում են, որպես «չինական վիրուս»: Պեկինն էլ իր հերթին հայտարարում է, որ այս վիրուսը Չինաստան է ներմուծվել ամերիկացիների կողմից:

Հասկանալի է  ԱՄՆ-ի և Չինաստանի միջև այս տեղեկատվական պատերազմի իմաստը:

Հասկանալի չէ, թե ինչո՞ւ է ՀՀ նախագահի պաշտոնը զբաղեցնող Արմեն Սարգսյանը ներգրավվում այդ պատերազմի  մեջ: Ակնհայտ է, որ Հայաստանն այդ պատերազմում չպետք է մասնակցի: Նշանակում է, որ Արմեն Սարգսյանի այս քայլը պայմանավորված էր հանգամանքով, որը ոչ մի կապ չունի Հայաստանի շահերի հետ:

Սակայն այս հանգամանքը չի հուզում նաև Փաշինյանին: Քանզի նա արդեն տեսել է Արմեն Սարգսյանի հայտնի «քաղաքացիության թուղթը» և «բավարարված է» իրեն զգում: Իսկ Արմեն Սարգսյանն էլ «հատուցում և հատուցելու է» այս ամենի դիմաց:

Չինաստանի ու ԱՄՆ-ի վեճերի մեջ մխրճվելու հարցում Հայաստանի հերն էլ անիծած:

Սա է իրականությունը:

Դավիթ Մկրտչյան