Տնից դուրս գալ կենսական անհրաժեշտության դեպքում, ունենալ անձնագիր կամ սոցքարտ

ՀՀ վարչապետ Նիկոլ Փաշինյանն ուղերձով դիմել է ՀՀ քաղաքացիներին: Նա նշել է՝ նոր կորոնավիրուսի համաճարակը ոչ միայն շարունակում է տարածվել աշխարհում, այլև ԱՀԿ համաձայն՝ նոր թափ է հավաքում: ՀՀ վարչապետը հայտնել է՝ աշխարհում կորոնավիրուսի ավելի քան 350 000 հաստատված դեպք կա, ավելի քան 16 000 մարդ մահացել է վարակից:

Փաշինյանն ընդգծել է՝ վիրուսը հիմնականում անվտանգ է երեխաների, երիտասարդների համար, դրա հիմնական զոհը դառնում են 70-ից բարձր տարիքի անձինք, նաև խրոնիկ հիվանդություն ունեցողները, ուստի հիմնական խնդիրը մեր վատառողջ հայրենակիցներին, ծնողներին, տատիկ-պապիկներին պաշտպանելն է: ՀՀ վարչապետը կրկին հիշեցրել է՝ վարակվելու փաստն ինքնին դատավճիռ չէ, նաև շեշտել՝ պետք է ամեն ինչ անել մահվան ելքով դեպքերից խուսափելու համար, և հենց դրան են միտված եղել կառավարության գործողություններն ամենասկզբից:

«Մենք ուսումնական պրոցեսը դադարեցրել ենք ոչ միայն երեխաներին պաշտպանելու, այլև նրանց միջոցով վարակի տարածում թույլ չտալու համար: Մեր խնդիրը նաև առավել խոցելի խմբերին պաշտպանելն է և առողջապահական համակարգի անտանելի բեռնվածությունը կանխելը: Այսօր՝ 18 :30-ի դրությամբ ունենք կորոնավիրուսի հաստատված 249 պացիենտ, որոնց մեծ մասը Նորք ինֆեկցիոնում է, մյուսները հանրապետության այլ բուժհաստատություններում: 80-ից բարձր տարիքի պացիենտ չունենք, թոքաբորբ տանող 30 հիվանդ ունենք»,- տեղեկացրել է նա:

Վարչապետը հայտնել է, որ կորոնավիրուսի վարակակիրներից մեկի՝ 77-ամյա մեր հայրենակցի վիճակը ծայրահեղ ծանր է, մյուսներից 4-ի վիճակը ծանր է; Կան 868 մեկուսացված քաղաքացիներ, 2419 քաղաքացու համար սահմանված է ինքնամեկուսացում տներում: Փաշինյանը հույս է հայտնել, որ նրանք ճշգրտորեն կպահպանեն մեկուսացման կանոները: Նա ներկայացրել է Հայաստանում կորոնավիրուսի վարակման դեպքերի հայտնաբերման աշխարհագրությունը, նման դեպքեր են եղել Երևանում, Արմավիրի, Արարատի, Արագածոտնի, Կոտայքի, Շիրակի մարզերում:

Փաշինյանն ասել է, որ քաղաքացիները հնարավորություն են ունենալու այցելել խանութ, բանկեր, դեղատներ, բայց նաև խնդրել՝ առավելապես օգտվել օնլայն ծառայություններից: Նա քաղաքացիներին կոչ է արել տնից դուրս գալ կենսական անհրաժեշտության դեպքում՝ ունենալով անձնագիր կամ սոցքարտ, երկու հոգուց ավելի չհավաքվել անգամ բակերում, տանը պահպանել հիգիենայի կանոնները և հետևել Առողջապահության նախարարության հրահանգներին:

Կառավարության ղեկավարը նաև նշել է՝ այս մեկուսացման շրջանը հարմար առիթ է՝ ծխելը թողնելու, ավելորդ քաշից ազատվելու, թեթև սննդի կուլտուրա որդեգրելու, մարմնամարզության համար՝ պահպանելով առնվազն 10 մետր սոցիալական հեռավորություն ու բացառելով թիմային մարզաձևերը:

Ուղերձը վարչապետն ավարտել է լավ լուրով՝ տեղեկացնելով, որ այսօր արդեն դուրս են գրվել 4 քաղաքացիներ, և մեկուսացումից տուն է վերադառնում 37 քաղաքացի: