«Ամեն մարդ իր կյանքը չի զոհի իր ընկերների համար, մանավանդ՝ էս թվին». Իսպիրյանը՝ «Հաց բերողի» մասին (Տեսանյութ)

«Հաց բերող» Արթուր Սարգսյանի մահվան մեջ մեղավոր ենք մենք բոլորս: Այսպես է կարծում երգիչ Արթուր Իսպիրյանը: Zham.am-ի հետ զրույցում նա նշեց¸ որ Արթուրի մահը համատարած անտարբերության հետևանք էր:

«Բոլորս մեղավոր ենք¸ մեր անտարբերության հետևանք է¸ պետության անտարբերության հետևանքն է¸ բոլորս մեղավոր ենք: Շղթայական ռեակցիայով այս մեղավորությունները գնացել հասել են այսօրվա այդ ողբերգական վիճակին»¸-նշեց նա:

Արթուր Սարգսյանի հուղարկավորության համար ձևավորված քաղաքացիական հանձնախումբը դիմել էր Պաշտպանույան նախարարին՝ նրան Եռաբլուր-Պանթեոնում հուղարկավորելու համար: Պաշտոնական պատասխան նրանք չեն ստացել¸ սակայն Պաշտպանության նախարար Վիգեն Սարգսյանը հայտարարել է¸ որ «Եռաբլուրը» զինվորական պանթեոն է, այնտեղ հանգչում են մարդիկ, ովքեր զոհվել են մարտական գործողությունների ժամանակ:

«Որպես պաշտպանության նախարար՝ համարում եմ, որ չի կարելի «Եռաբլուրը» խառնել որևէ այլ թեմայի հետ, անկախ նրանից, թե ինչ հանգամանքեր կան։ Հատկապես երբ կա հարցի քաղաքական բնույթ՝ «Եռաբլուրը» չպետք է քաղաքականացվի»:

Իսպիրյանը կարծում է¸ որ էական չէ¸ թե որտեղ կթաղվի «Հաց բերողը»:

«Որտեղ էլ¸ որ լինի Արթուրը թաղված¸ այնքան շատ է սերն իր նկատմամբ¸ ու այնքան էներգետիկայով մարդ է¸որ որտեղ էլ¸ որ լինի իր հիշատակը վառ է պահվելու: Եռաբլուրում¸ թող չլինի¸ թող ուրիշ տեղ լինի»¸-ասաց Իսպիրյանը:

Երգիչը ջերմությամբ է հիշում «Հաց բերողին»: Նրա մոտ վառ տպավորվել է¸ երբ Վերնիսաժում Արթուրը միշտ խունկ էր ծխում:

Մանրամասները՝ տեսանյութում

Անի Շաբոյան

Zham.am