Ո՞րն է վտանգավոր Հայաստանի համար. կորոնավիրուսը թե՞ Արսեն Թորոսյանը

Դատեք ինքներդ, ՀՀ առողջապահության նախարար Արսեն Թորոսյանը հայտարարում է, որ «չի կատարելու դատարանի որոշումը, քանզի իր համար այս դատարանը լեգիտիմ չէ»: Կարելի՞ է ենթադրել, որ Արսեն Թորոսյանի հետ համամիտ է նաև Նիկոլ Փաշինյանը, քանզի այդ հայտարարությունից հետո Թորասյանը  մնում է դեռ իր պաշտոնում:

Եթե այդպես է, ապա ցանկացած քաղաքացի կարող է հայտարարել, որ ինքն էլ չի հավատում դատարանին, ասենք իր խնդրի հետ կապված:

Այսօր բազմաթիվ դատական նիստեր են ընթանում տարբեր գործերով: Այդ գործերի մեջ ներառված անձինք նույնպես կարող են հայտարարել, որ «չեն հավատում դատարաններին» և այդ իսկ պատճառով «չեն կատարելու նրանց որոշումները»: Դեռ մարդիկ տաք են և չեն զգում այս ամենի բացասական հետևանքները երկրի համար:

Այսօր բոլորը զբաղված են կորոնավիրուսով, բայց, եթե այս վարակը վտանգ է ներկայացնում մեր առողջությանը, ապա Արսեն Թորոսյանը վտանգ է ներկայացնում ներկայումս առկա ողջ պետական համակարգին, քանզի.  եթե բոլորը վարակվեն Թորոսյանի տեսակետով, ապա երկրում կորոնավիրուսի հետ մեկտեղ կկազմաքանդվի նաև ողջ պետական կառավարման համակարգը: Ի դեպ լավ կլիներ լսել նաև ՀՀ արդարադատության նախարարի, ԲԴԽ-ի ներկայացուցիչների կարծիքը այս խնդրի շուրջ: Սակայն նրանք կամ կլռեն այդ մասին, կամ էլ տարբեր տիպի հիմնավորումներ կբերեն, իրենց կոլեգային արդարացնելու համար:

Ներկայիս իշխանությունները դա չեն հասկանում, քանզի իրենք իրենց տեսակով նույնպես Թորոսյանի  պես են մտածում: Նրանք դա կսկսեն հասկանալ, երբ երկրի ամենաթողությունն ու անարխիան կսկսի սպառնալ նաև իրենց անմիջական իշխանությանը: Այդպիսին է իրավիճակը: Սրանք խորը պարզունակ մարդիկ են, որոնց համար համակարգային պետական մտածողությունը հակացուցված է եղել ի սկզբանե:

Սա է իրականությունը:

Դավիթ Մկրտչյան