Ողջ աշխարհն անգամ ոստիկանական մեթոդներով արգելում է մարդկանց դուրս գալ փողոցներ, իսկ ՀՀ-ում վարչապետն անձամբ է գնում սուպերմարկետներ ու ռեստորաններ

«Հրապարակ» թերթը գրում է. «Թվում էր՝ արտակարգ դրությունը հայտարարվելու է, որ նախկինում թույլ տրված սխալներից խուսափենք և չարաղետ վարակի դեմը կարողանանք առնել։ Ասենք՝ վերջապես ավելի լուրջ վերաբերմունք դրսևորվի այս համավարակին։ Ոչ թե հայտարարենք, թե «բարի մարդկանց վիրուսը չի կպչում», կամ՝ «կորոնավիրուսն ում շունն է», որ մեզ խանգարի հանրաքվե անել ու քաղաքական հակառակորդներին ոչնչացնել, այլ հետևենք աշխարհի օրինակին և զգուշության բոլոր կանոնները պահպանելով՝ պահպանենք մեր ազգաբնակչության առողջությունը։

Պարզվեց՝ արտակարգ դրությունը ոչ մի սահմանափակում չի պարունակում մարդկանց տեղաշարժի, հանրային օբյեկտների աշխատանքի առումով։ Ոչ մի ռեստորան ու հանրային օբյեկտ այս օրերին չի փակվել, դեռ ավելին՝ վարչապետն անձամբ է շրջում սուպերմարկետներով ու ռեստորաններով և ուրախանում՝ այնտեղ մարդկանց հանդիպելով։

Ողջ աշխարհն անգամ ոստիկանական մեթոդներով արգելում է մարդկանց դուրս գալ փողոցներ, խանութներ մտնում են հերթով, որ միմյանց չվարակեն, իսկ մեզանում վարչապետն ուրախ-ուրախ հայտարարում է, որ անգամ տուրիստներ կան երկրում, իսկ ռեստորանները, ինչպիսի հաջողություն, դատարկ չեն։

Հարց է ծագում՝ այդ դեպքում ինչո՞ւ հայտարարեցիք արտակարգ դրություն, որ խոսքի ազատության սահմանափակումներ մտցնեք և ձեր վաղեմի երազա՞նքն իրականացնեք»,-գրում է թերթը։

Մանրամասները՝ թերթի այսօրվա համարում