Դիմակավորված անձիք հարձակվել են Էդուարդ Պողոսյանի վրա․ նրան առաջարկում են 250 հազար դոլար, որպեսզի հոր սպանության հետքերով չգնա. Տեսանյութ

Politik.am-ը գրում է:Լրագրող Զարուհի Մեջլումյանը իր ֆեյսբուքյան էջում գրել է, որ հոր սպանության հետքերով գնացող Էդուարդ Պողոսյանի վրա հարձակվել են դիմակավորված անձիք․«Հրավիրում եմ լրագրողների ուշադրությունը։ Մհեր Պողոսյանն, ով 25 տարի առաջ կորցրել է հորը ու փորձում է հասնել գործի 25 տարի առաջ կայացված դատավճռի վերաբացման, հարձակման է ենթարկվել, երբ վերջին անգամ դատավարությանը մասնակցելու նպատակով եկել էր Հայաստան»։

Հիշեցնենք, որ 1994 թ. ապրիլի 16-ին Էջմիածնում Մանվել Գրիգորյանին պատկանող Ակնալճի ամառանոցում հրազենի կրակոցից զոհվել էր  «Տոչպրիբոր» գործարանի տնօրեն Մհեր Պողոսյանը:

Սպանվածի որդին՝ Ռուսաստանում բնակվող Էդուարդ Պողոսյանը, ով հեղափոխությունից հետո պայքար է սկսել արդարությունը վերականգնելու և հոր սպանությունը բացահայտելու համար, բաց նամակով դիմել է վարչապետին, ԱԱԾ տնօրենին, գլխավոր դատախազին ու ոստիկանապետին։ Գործին ընթացք էր տրվել։

Էդուարդ Պողոսյանը իր ֆեյսբուքյան էջում գրել է, որ հարձակման է ենթարկվել, երբ գտնվել է Հայաստանում։ Նա գրել է, որ տեսանյութը հրապարակում է, քանի որ իրավիճակը շատ է բարդացել։ 

Էդուարդ Պողոսյանը մեզ հետ զրույցում տեղեկացրեց, որ դեպքը տեղի է ունեցել նախորդ տարվա աշնանը։ Պողոսյանը կասկածներ ունի, թե ովքեր կարող էին կանգնած լինել հարձակման հետևում, բայց անուններ չի տալիս, քանի որ այս պահին փաստեր չկան, որպեսզի նույնը համոզի նաև հանրությանը։ Նրա խոսքով ինքը չի դիմել իրավապահներին, քանի որ տեղյակ է, որ իր հոր սպանության մեջ կասկածվող Հրանտ Գրիգորյանի որդին իրավապահ համակարգում է աշխատում։ Մեզ հետ զրույցում նա նաև տեղեկացրեց, որ հոր սպանության հետքերով չգանալու համար իրեն առաջարկել են 250 հազար դոլար։