«Կոնգրես-ՀԺԿ» դաշինքը անհանգստացած է քարոզարշավի ընթացքում տեղի ունեցող միջադեպերով

Կոնգրես-ՀԺԿ Դաշինքի նախըտրական շտաբը հայտարարություն է տարածել՝ անդրադառնալով նախընտրական բախումներին: Հայտարարության մեջ, մասնավորապես ասված է.

«Մամուլը բազմաթիվ տեղեկություններ է հաղորդում այն մասին, որ նախընտրական քարոզարշավը ուղեկցվում է բռնարարքներով։ Մասնավորապես, վերջին օրերին Արմավիրի մարզի Ջրառատ գյուղում «Օհանյան-Րաֆֆի-Օսկանյան» դաշինքի քարոզարշավի ժամանակ միջադեպ է տեղի ունեցել,  օգտագործվել է սառը զենք, հնչել են կրակոցներ: Արդյունքում՝ չորս վիրավոր տեղափոխվել է հիվանդանոց: Ընդդիմախոսների  ծեծը կազմակերպելու գործում հայտնի և դրանից հետո անպատիժ մնացած փոխոստիկանապետ Լյովա Երանոսյանի եւ իր եղբոր՝ ոստիկանության բարձրաստիճան սպա Լեռնիկ Երանոսյանի հասցեին հնչող և տեսանյութերով հիմնավորվող մեղադրանքները կրկին ապացուցում են, որ անպատիժ հանցագործությունը ծնում է նոր հանցագործություններ:

Մի այլ միջադեպ է տեղի ունեցել Երևանի Աջափնյակ համայնքում, որտեղ ՀՀԿ թեկնածու Արման Սահակյանի թիմակիցները դարանակալել և փորձել են հաշվեհարդար տեսնել ԲՀԿ խմբակցության պատգամավոր Վահան Կարապետյանի հետ։

Կոնգրես-ՀԺԿ դաշինքը անհանգստացած է քարոզարշավի ընթացքում տեղի ունեցող այսօրինակ դեպքերով, ինչը արդյունք է իրավապահ մարմինների՝ իրավիճակին ոչ համարժեք արձագանքի: Կոչ ենք անում ՀՀ պատկան մարմիններին՝ հնարավորինս կարճ ժամկետում իրականացնել հետաքննություն և պատժել մեղավորներին: Այսօրինակ միջադեպերի հնարավոր արագ բացահայտումը անհրաժեշտ է՝ ապահովելու համար նախընտրական քարոզարշավի օրինականությունը և բոլոր մասնակիցների միջև հավասարությունը»: