Հանրաքվեի «ԱՅՈ»-ի շտաբը դիմում է մանիպուլյացիոն տեխնոլոգիաների, քանի որ չի կարող քաղաքացիներին ասել՝ ազատեք ՍԴ 7 դատավորներին. Արմեն Բադալյան

Սահմանադրական փոփոխությունների հանրաքվեին «ԱՅՈ»-ի շտաբի կողմից քարոզարշավի շեշտը դրվում է, օրինակ, ճանապարհների վերանորոգման, արտագաղթի նվազման, ազատ, արդար ընտրությունների, նոր աշխատատեղերի, տնտեսական աճի վրա, որոնք որևէ կապ չունեն Սահմանադրական դատարանի հետ, քանի որ իշխանությունները չեն կարող քաղաքացիներին իրականությունն ասել, որ վերջիններս քվեարկելու են ՍԴ յոթ դատավորներին աշխատանքից ազատելու համար, որպեսզի նրանց  փոխարեն վարչապետի կողմից ներկայացված դատավորներ նշանակվեն, և ՍԴ-ն Փաշինյանի գրպանային դատարանը դառնա:

«Իշխանությունները դիմում են մանիպուլյացիոն տեխնոլոգիաների կիրառմանը, քանի որ ուրիշ պատճառ չկա, որ կարողանան մարդկանց խթանել գնալ ընտրությունների և «ԱՅՈ» քվեարկել: Իրականության փոխարեն ներկայացվում է վիրտուալ իրականություն: Մանիպուլյացիոն տեխնոլոգիաների կիրառումը նորմալ է, դա ամբողջ աշխարհում է տարածված, և «ԱՅՈ»-ի շտաբը դրան էլ պետք է գնա, քանի որ ուրիշ ձևով չի կարող ասել՝ գնացեք, ՍԴ յոթ անդամներին աշխատանքից ազատեք: Դա ոչինչ չի տա քաղաքացիներին, քանի որ հեղափոխական էյֆորիան ավարտվել է»,-ասաց քաղտեխնոլոգը:

«Եթե լիներ, օրինակ, «Հանրապետական» կուսակցության կամ «Լուսավոր Հայաստան»-ի կողմից ձևավորված «ՈՉ»-ի ճամբար, «սևի» ու «սպիտակի» ռազմավարությունը կրկին կաշխատեր, առաջին դեպքում՝ ավելի ընդգծված, երկրորդի դեպքում՝ համեմատաբար թույլ: Բայց քանի որ «ՈՉ»-ի ճամբարը ձևավորվել է իրավաբանների, իրավապաշտպանների, փաստաբանների կողմից, իշխանության համար դժվար կլինի նրանց «սև» ներկայացնել»,-ասաց նա:

Վերջինս նշեց նաև, որ եթե «ՈՉ»-ի ճամբարն իր քարոզարշավը գրագետ իրականացնի, ապա «ԱՅՈ»-ն կպարտվի, որովհետև դժվար է 850 000 անձի համոզել մասնակցել հանրաքվեին, իսկ նրանցից 650 000-ն էլ «ԱՅՈ» քվեարկի: «Դա գրեթե անհնար է: Հանրաքվեին մասնակցելու մոտիվացիան շատ թույլ է, թեև, իհարկե, կա «պողոսների» մի զանգված, որը անպայման գնալու և «ԱՅՈ» է քվեարկելու»,-ասաց քաղտեխնոլոգը, ապա նշեց, որ «ԱՅՈ»-ի շտաբը մի քանի գործիքներ ունի, որոնք կարող է կիրառել քարոզարշավի ընթացքում:

«Առաջինը՝ հզոր քարոզչամիջոց» «Հանրային» հեռուստաընկերությունը, որը ծայրահեղ պրոիշխանական քարոզչություն է իրականացնում, երկրորդ՝ վարչական ռեսուրս՝ տարածքային կառույցներ, նախարարություններ և այլն, և երրորդ՝ կարող է անգամ փորձել ընտրատեղամասերում «ընտրանկարչությամբ» զբաղվել: Այս երեքի դեմ «Ոչ»-ի շտաբն ունի գրագետ աշխատելու հնարավորություն, որի դեպքում կչեզոքացի իշխանության ռազմավարությունը»,-ասաց Բադալյանը: