ԲՀԿ-ն իր լիցենզավորված անդամներին չի տա «ոչ»-ին
«Ոչ»-ի քարոզչական կողմի համակարգող Ռուբեն Մելիքյանը, ինչպես հայտնի է, դիմել էր ԱԺ ԼՀԿ ու ԲՀԿ խմբակցություններին, որոնք տեղամասերում ունեն հանձնաժողովի լիցենզավորված անդամներ, որպեսզի ընտրական հանձնաժողովում «այո»-ի հետ միասին անդամներ նշանակելու հնարավորություն ունենան։
«Ոչ»-ի ճակատն այս թափուր տեղերը սեփական ուժերով լրացնելու հնարավորություն չունի։ ԼՀԿ-ն չէր մերժել, մեկնաբանությամբ, որ ընտրությունների արդար ընթացքը վերահսկելու համար իրենք անդամներ կտան, իսկ «Բարգավաճ Հայաստանի» դիրքորոշումը դեռ հայտնի չէ։
ԲՀԿ գլխավոր քարտուղար Նաիրա Զոհրաբյանը, ում դիմել էր Մելիքյանը, Hraparak-ի հետ զրույցում ասաց․ «Այո, պարոն Մելիքյանը դիմել է ինձ, եւ մեր դիրքորոշումը հստակ է, եւ պետք է վերահաստատեմ «Բարգավաճ Հայաստանի» քաղաքական դիրքորոշումը։ Այն է՝ այս գործընթացին մենք չենք մասնակցելու։ Կարծում եմ՝ դրանով ամեն ինչ ասված է»։
Նկատեցինք՝ «ի դեպ, Արման Եղոյանը երեկ ԲՀԿ-ին գովում էր դրա համար»։ Նաիրա Զոհրաբյանը որեւէ մեկնաբանություն չունի, ընդամենն ասում է․ «Ես չեմ կարող մարդկանց էմոցիաները եւ գնահատականներն ինչ-որ սրբագրումների ենթարկել։ Մենք չենք վերլուծում՝ իրենց գնահատականն է, իրենց իրավունքն է»։
Հետևեք մեզ Facebook-ում