Երկրում ատելության քարոզի գլխավոր մեղավորը Նիկոլ Փաշինյանն է. Տեսանյութ

Ասել, որ այսօր Հայաստանում նորմալ իրավիճակ չէ, նշանակում է ոչինչ չասել: Նիկոլ Փաշինյանը Պետրոսի մոտ հյուրընկալման ընթացքում խոսում էր երկրում ատելության մթնոլորտի հաստատման մասին: Արդարացի նշելով, որ դա կարող է բերել «նոր հոկտեմբերի 27-եր»: Այս հարցադրման հետ չի կարելի չհամաձայնվել: Սակայն Փաշինյանն ինքն իրեն պիտի հարցնի, իսկ ո՞վ է այս անհանդուրժողականության մթնոլորտի գլխավոր մեղավորը: Ո՞վ էր հանրահավաքի ընթացքում իր հակառակորդներին «ծեփում պատերին ու պառկացնում ասֆալտին», ո՞վ էր խոսում «վնգստացող» դատավորների մասին, ով՞ էր կոչ անում շրջափակել դատարանները, միայն այն բանի համար, որ դատավոր Գրիգորյանը փոխեց 2-րդ նախագահի խափանման միջոցը:

Բնականաբար, եթե Փաշինյանը իր քաղաքական հակառակորդներին անվանում է «շնաբարո վնգստացողներ», ապա նրանք էլ պիտի հակադարձ պատասխանը տան: Սա մոտավորապես նույն  է, որ Հիտլերը  հրեաներին կոտորելու կոչերից հետո, երբ վերջիններս սկսում են հայհոյել իրեն, ֆյուրերը հրեաներին անվաներ «անհանդուրժողներ» կամ «ահաբեկչության քարոզինչներ»:

Նիկոլ Փաշինյանի մոտ ձևավորվել է պարզունակ կապրիզներով տառապող երեխայի սինդրոմ, ով համարում է, որ բոլորին կարող է հայհոյել, սակայն, երբ իրեն են համարժեք պատասխան տալիս նրանց համարում է «ահաբեկչության քարոզիչներ»:

Սա իսկական ողբերգություն է Հայաստանի համար՝ ունենալ այս աստիճանի սահմանափակ պատկերացումների ղեկավար: Մարդ, ով չի զգում իր նույնիսկ տարրական սխալները, բայց պատրաստ է իր հակառակորդների մեջ տեսնել ոխերիմ թշնամիներ:  Եվ այս ամենը երկրի համար ճակատագրական պահին, երբ լարված է իրավիճակը Սիրիայում, Իրանի շուրջ և ցանկացած պահի տարածաշրջանում կարող է բռնկվել պատերազմ:

Մարդ, ով տարրական պատկերացում չունի ղարաբաղյան բանակցային գործընթացից, ոչինչ չի հասկանում տնտեսությունից, իրեն շրջապատել է իր նմաններով: Սա իսկապես մեծ ողբերգություն է մի ժողովրդի համար, ով այս 30 տարիների ընթացքում այդպես էլ չկարողացավ ձեռք բերել պետական գիտակցություն:

Սակայն հանուն արդարության, պետք է նշել, որ այս ամենի մեղավորը միայն Փաշինյանը չէ: Սա նաև չկայացած ազգային վերնախավի հարցն է  :

Սա է իրականությունը:

Դավիթ Մկրտչյան