Քայլեր են ձեռնարկվում Ծառուկյանի դեմ․ նրա հնարավորությունները փորձում են կրճատել

Մեր նախորդ հոդվածներից մեկում կանխատեսել էինք, որ ՍԴ յոթ դատավորների դեմ նախաձեռնված գործողությունների ավարտից հետո իշխանությունները քայլեր են իրականացնելու նաև ԲՀԿ առաջնորդ Գագիկ Ծառուկյանի դեմ։

Հաշվարկը պարզ է՝ Նիկոլ Փաշինյանը և իր իշխանությունը չեն կարող հանդուրժել քաղաքական դաշտում Ծառուկյանի հնարավորություններն ունեցող գործչի։ Սա հատկապես կարևոր է դառնում, երբ անզեն աչքով էլ նկատելի է դառնում վարչապետի և իր քաղաքական թիմի վարկանիշի սրընթաց նվազումը։

Փաշինյանի աջակիցների մեծ մասը սոցիալական տարբեր խնդիրներ ունեցող քաղաքացիներն են։ Նրանք աջակցելով Փաշինյանին հույս ունեին, որ ճանապարհներից կհանվեն արագաչափերը, որ բանկերը չզրոյացնեն իրենց վարկերը, որ կստեղծվեն հազարավոր նոր աշխատատեղեր ու իրենք կապրեն ապահով պայմաններում։ 

Արդեն երկու տարի է Փաշինյանը իշխանության է, բայց իր խոստումներից որևէ մեկը չի կատարվել։ Ավելին կատարվել են տրված խոստումների հակառակ գործողությունները։

Ահա այս ֆոնին է, որ հասարակության այդ զանգվածը կրկին թեքվելու է Գագիկ Ծառուկյանի կողմ։ ԲՀԿ առաջնորդն իր գործունեության ողջ ընթացքում սոցիալական, բարեգործական տարբեր ծրագրեր է իրականացնում, որոնք թեթևացնում են սոցիալական խնդիրներ ունեցող քաղաքացիների բեռը։  

Իշխանությունները սա լավ են հասկանում և ինչպես արդեն նկատել էինք նախապատրաստում են քայլեր, որոնք պետք է իրականացվեն ՍԴ-ն ուզուրպացնելուց հետո։ Երեկ հայտնի դարձավ, որ կառավարությունն առաջարկել է փոփոխություններ կատարել «Բարեգործության մասին» օրենքում, որոնցից թերեւս ամենաէականը 18-րդ հոդվածում հետևյալ պարբերության ավելացումն է. «Բարեգործական ծրագրերի ընթացքի ու արդյունավետության գնահատման մշտադիտարկում (մոնիթորինգ) իրականացնելու կարգը սահմանում եւ հաստատում է լիազորված մարմինը»:

Այսպիսով, կառավարությունն իր վրա է վերցնում բարեգործական ծրագրերի արդյունավետության գնահատման լիազորությունը, իսկ դա նշանակում է, որ բարեգործական ծրագրերը մշտապես գտնվելու են կառավարության հսկողության ներքո։

Այս որոշմամբ, ըստ ամենայնի, կառավարությունը ցանկանում է իր վերահսկողության տակ վերցնել «Գագիկ Ծառուկյան» բարեգործական հիմնադրամը, որը հազարավոր ծրագրեր է իրականացնում։ Այլ հիմնադրամներ ևս կան թիրախում, բայց գլխավորը նշված հիմնադրամն է լինելու։

Աղբյուրը` politik.am