Ի՞նչ տրամաբանությամբ է առհասարակ Փաշինյանն ընտրում կադրեր
«Հրապարակ» թերթը գրում է. «Լավ, ինչո՞վ է բացատրվում կադրային այս խայտառակ ընտրությունը, որն իրականացնում է 2018 թվականից ՀՀ վարչապետի պաշտոնը զբաղեցնող Նիկոլ Փաշինյանը մինչ օրս։
Ինչո՞ւ, ասենք, Կարեն Կարապետյանի կառավարության կադրերից պետք է մնային Ստեփան Մնացականյանը, Դավիթ Տոնոյանը, Դավիթ Անանյանը, իսկ տրանսպորտի, գյուղատնտեսության, ֆինանսների, արդարադատության և մյուս նախարարները հեռանային։ Ինչո՞վ է, ասենք, գլխավոր դատախազ Արթուր Դավթյանն ավելի լավ կադր, քան Արփինե Հովհաննիսյանը, կամ ՀՔԾ ներկայիս պետ Սասուն Խաչատրյանն ինչո՞վ է գերազանցում նախկին պետ Վահրամ Շահինյանին։
Ի՞նչ տրամաբանությամբ են առհասարակ ընտրվում կադրերը։ Ի՞նչն էր, ասենք, Նիկոլ Փաշինյանին գոհացնում կրթության և գիտության նախարար Արայիկ Հարությունյանի աշխատանքում, որ նա որոշեց այդ նախարարությունը դարձնել սուպերնախարարություն՝ դրան կցելով ևս երկու ոլորտ։ Կամ՝ ո՞րն էր ԵՊՀ ռեկտոր Արամ Սիմոնյանի հանցանքը, որ չկարողացան ներել և հասան նրա պաշտոնանկությանը, իսկ, այ, Ռուբեն Միրզախանյանը և Ոստանիկ Մարուխյանը՝ մեկը մանկավարժականի, մյուսը՝ պոլիտեխնիկի ռեկտորի պաշտոնում, շարունակում են անվրդով պաշտոնավարել։
Եվ ինչո՞ւ ոչ մի կերպ չեն կարողանում գտնել ԵՊՀ ռեկտորացու, որ վերջապես ընտրություններ անցկացնեն, և մայր բուհը ռեկտոր ունենա։ Կամ՝ ինչո՞ւ են ոստիկանության պետը և ԱԱԾ տնօրենը ամիսներ շարունակ մնում ժամանակավոր պաշտոնակատարներ։ Մի՞թե իրականությանը համապատասխանում են այն լուրերը, որ նրանց որոշել են կախման մեջ պահել, ուստիև՝ կառավարելի»։
Մանրամասները՝ թերթի այսօրվա համարում:
Հետևեք մեզ Facebook-ում