Գերմանիայի կանցլեր Անգելա Մերկելը «հիբրիդային հեղաշրջո՞ւմ» է նախապատրաստում Նիկոլ Փաշինյանի դեմ. Տեսանյութ

Այն,  որ  բոլորն ուզում են, որ Փաշինյանի գործերը վատ լինեն փաստ է: Ռոբերտ Քոչարյանը, Սերժ Սարգսյանը, ՀՀԿ-ն, ՀՅԴ-ն, ԲՀԿ-ն և նույնիսկ  անշնորհակալ «լուսավորներն» ամեն ինչ անում են, որ Փաշինյանը ձախողվի: Այս շրջանակներից բացի  Փաշինյանի դեմ «հիբրիդային հեղաշրջում» են պատրաստում նաև Վանեցյանը, ՍԴ նախագահ Հրայր Թովմասյանը և  Ռուսաստանը: Քանզի բոլորին է հայտնի, թե ում ընկերն է Վլադիմիր Պուտինը: Ահա այսպիսի ոչ բարենպաստ պայմաններում է մի կերպ գոյատևում խեղճ Փաշինյանը: Մարդն ընդամենը ուզում էր իր տունը վերանորոգել ընդամենը  2 մլն դոլարով, բայց  ինչպիսի  վայնասուն բարձրացավ: Ուզում էր ոչ թե իր, այլ ՀՀ վարչապետի համար 55 մլն-անոց ինքնաթիռ գնել, բայց սրիկաները աղմուկ բարձրացրեցին ու խափանեցին այս ժողովրդահաճո  գործարքը: Ոչ թե իր, այլ ՀՀ վարչապետի ընտանիքի անդամները ամեն ամիս սև խավիար են պատվիրում, որպեսզի հանուն ժողովորդի իրենց միտքը  ավելի լավ աշխատի, բայց  կրկին չարամիտներն աղմուկ հանեցին:

Սրանք բոլորը ուղղորդվում են մեկ հակապետական, հակաժողովրդական կենտրոնից, որի նպատակն է վարկաբեկել ժողովրդի կողմից ընտրված  երկրի առաջնորդին:

Բայց, երբ Բեռլինում Փաշինյանին Քոչարյանի գործի մասին արդեն եվրոպացի Անգելա Մերկելն է հետաքրքրվում, դա նշանակում է, թե ինչ չափսերի է հասել հայաստանյան քրեա-օլիգարխիայի ախորժակները: Իսկ, երբ Դոդոնի հետ հանդիպման ժամանակ Փաշինյանին տրամադրեցին այն նույն գրիչից, որը  ժամանակին իրեն տրամադրել էր Հրայր Թովմասյանը արդեն պարզ է դառնում, որ այդ գրիչը սովորական գրիչ չէր. այն իր մեջ պարունակում էր խորհուրդ: Իսկ դա նշանակում է, որ Փաշինյանի դեմ «հիբրիդային հեղաշրջումը» կրում է համաշխարհային բնույթ որտեղ խառնված են Ռոբերտ Քոչարյանը, Սերժ Սարգսյանը, ՀՀԿ-ն, ՀՅԴ-ն, լուսավոր Էդմոնը, Միքայել Մինասյանը, Վանեցյանը, Պուտինը, Մերկելը և իհարկե Հրայր Թովմասյանը:

Ահա այսպիսի պայմաններում պիտի մեր ժողովուրդը «Այո» ասի հանրաքվեին, որպեսզի վերջապես առաջնորդն ազատվի բոլոր տեսակի կապանքներից և կարողանա հանգիստ խղճով լուծել Ղարաբաղի հարցը «Մյունհենյան սկզբունքների» հիման վրա, ոից պիտի գոհ լինեն Ադրբեջանը «Նոր» Հայաստանն ու «Նոր» Արցախը: Իսկ, որպեսզի բոլորի շահերը համընկնեն պիտի Հայաստանից ու Արցախից չեզոքացվեն բոլոր տեսակի քրեաօլիգարխիայի ներկայացուցիչները՝ Հրայր Թովմասյանից մինչև Պուտին: Իսկ երկու օր առաջ պարզվեց, որ այս ծրագրին կարող է խանգարել նաև Անգելա Մերկելը:

Սա է իրականությունը:

Պողոսյան Պողոս, Zham.am-ի  հումորային բաժին