Լավրովը հայ-թուրքական սահմանի հնարավոր բացման մասին

Մոսկվան պատրաստ է աջակցել Հայաստանի և Թուրքիայի միջև բանակցություններին, երբ դրանք մեկնարկեն, և կողջունի, մասնավորապես, հայ-թուրքական սահմանների բացումը, հայտարարեց ՌԴ արտգործնախարար Սերգեյ Լավրովը:

«Regional Post — Caucasus» ամսագրին տված հարցազրույցում ռուսաստանցի նախարարը նշեց, որ ՌԴ-ն կարևոր դերակատարում է ունեցել 2007-2009 թթ. Հայաստանի և Թուրքիայի միջև հարաբերությունների տաքացման գործում, սակայն ավելի ուշ այդ գործընթացը դադարեցվեց: Փոխանցում է «ՌԻԱ Նովոստի»-ն:

«Սակայն սկզբունքայնորեն կարևոր է, որ կողմերը ցուցադրեցին պայմանավորվելու և լուրջ ու պատասխանատու որոշումներ ընդունելու ունակություններ: Վստահ եմ, որ Հայաստանն ու Թուրքիան ունակ են կարգավորել առկա խնդիրները: Ընդ որում. շատ բան հենց իրենցից է կախված: Չէ որ քաղաքական գործիչների ճկունությունը կախված է ոչ միայն օբյեկտիվ դժվարությունների իրատեսական վերլուծությունների խորությամբ, այլև լավատես լինելու ունակությամբ՝ սեփական քաղաքացիների հույսերն ու սպասումներն իրականացնելու համար: Երբ Անկարան և Երևանը նստեն բանակցությունների սեղանի շուրջ, Ռուսաստանը պատրաստ կլինի նրանց ամենաակտիվ աջակցությունը ցուցաբերել», - ասաց նա:

«Իհարկե, մենք միայն կողջունեինք, որ ԵԱՏՄ արտաքին սահմանի հայ-թուրքական հատվածը բաց լիներ մարդկանց, ապրանքների ու ծառայությունների ազատ տեղաշարժի համար: Դա անկասկած կլինի ի շահ ամբողջ տարածաշրջանի», - ընդգծեց Լավրովը:

Հարցազրույցում Սերգեյ Լավրովը նշեց նաև, որ ռուս-թուրքական հարաբերությունների կայունացումն ուղղված չէ երրորդ երկրների դեմ. «Ռուսաստանի և Թուրքիայի հարաբերությունների կայունացումը չարժե դիտարկել որպես մի գործընթաց, որը կարող է վնասել այլ պետությունների։ Ռուսաստանը չունի նման ծածուկ օրակարգ։ Մենք չենք ստեղծում քաղաքական կամ տնտեսական դաշինքներ՝ ուղղված երրորդ երկրների դեմ և ինչ–որ մեկի շահերին դիպչող», – ասաց նա:

Zham.am