Անհամաչափ ուժի կիրառման դրվագներ կային, դա մտահոգիչ է. Լարիսա Մինասյանը՝ քաղակտիվիստներին բերման ենթարկելու մասին. Տեսանյութ
Կադրերից թվում էր, թե անհամաչափ ուժի կիրառման ինչ-որ դրվագներ կային նաև: Այս մասին լրագրողների հետ հանդիպմանը հայտարարեց «Բաց հասարակության հիմնադրամներ-Հայաստանի»-ի գործադիր տնօրեն Լարիսա Մինասյանը՝ անդրադառնալով «ՎԵՏՕ» շարժման ղեկավար Նարեկ Մալյանին, «Քաղաքացիական գիտակցություն» ՀԿ ղեկավար Նարեկ Սամսոնյանին, «Ադեկվադ» միաբանության ղեկավար Արթուր Դանիելյանին, վարչության անդամ Կոնստանտին Տեր-Նակալյանին և ևս երկու անդամների ձեռնաշղթաներով Ոստիկանության 6-րդ վարչություն բերման ենթարկելուն՝ նշելով, թե դա մտահոգիչ է:
Հարցին՝ բերման ենթարկելու դեպքերը կարո՞ղ էին ընդդիմությանն ահաբեկելու փորձ լինել, Մինասյանն ասաց.
«Ես չեմ կարծում, որ դրանք ընդդիմությանն էին վերաբերում, որովհետև չեմ գտնում, որ դա ընդդիմությունն էր: Արդյո՞ք դա ահաբեկում էր, դրա մասին ես ընդհանարապես չեմ խոսի»:
Անդրադառնալով ՀՀ վարչապետ Նիկոլ Փաշինյանի՝ օրերս Կապանում կայացած ասուլիսի ընթացքում Սորոսի գրասենյակի՝ Հայաստանում ծավալած գործունեությանը անդրադարձին, Մինասյանն ասաց.
«Ես շատ բարձր գնահատեցի այն, որ վարչապետը ներկայացրեց՝ ում կողմից և ինչ նպատակներով է այս արշավը սկսված։ Կուզենայի միայն անդրադառնալ այն բանին, որ «Բաց հասարակության հիմնադրամներ-Հայաստան»-ի լեգիտիմությունը Հայաստանում նրանում չէ, որ մեզ չեն փակել, և դեռ գործել ենք նախորդ կոռումպացված, ավտորիտար ռեժիմի ներքո։ Մեր լեգիտիմությունը նրանում է, ինչ մենք անում ենք, անում ենք դա թափանցիկ, բաց և հաշվետու ձևով»,-ասաց Լարիսա Մինասյանը։
Վերջինս նշեց նաև, որ ինչ-որ տեղ համաձայն է Փաշինյանի այն պնդման հետ, որ նախորդ ռեժիմի կողմից հիմնադրամը չփակելու պատճառը բավական նենգ էր: «Նպանատիպ ռեժիմները, շատ ավելի ազնիվ գտնվելով, իրենց երկրներում փակել էին այդ հիմնադրամները՝ Բելառուսը, Թուրքիան, Ադրբեջանը, Ուզբեկստանը՝ տարիներ առաջ։ Մեր նախկին իշխանությունն ավելի հմուտ էր մոտեցել այդ հարցին և ամենախիստ խոսող, ամենահիմնովին քննադատող, համակարգային բնույթի քննադատություն անող մի փոքր խումբ կազմակերպություններին պահում էր մարգինալացված՝ ցույց տալու համար՝ «մենք հո ադրբեջանցի չենք»։ Դա վարկածներից մեկն է»,-նշեց Լարիսա Մինասյանը։
Հետևեք մեզ Facebook-ում