3 հատ կեղծ 20 հազար դրամանոց պատրաստելու եւ իրացնելու համար անչափահասներին սպառնում է մինչեւ 10 տարվա ազատազրկում

Սյունիքում աշնանն անչափահասների կողմից կեղծ փողեր պատրաստելու, պահելու եւ իրացնելու գործով նախաքննությունն ավարտվեց:

Նախաքննության ընթացքում պարզ է դարձել, որ անչափահասներ Ալենը, Արմանն ու Կարենը նոյեմբերին տպող սարքով կրկնօրինակելու եղանակով պատրաստել են 3 հատ 20 հազար ՀՀ դրամ անվանական արժեքով կեղծ թղթադրամ: Դրանցից մեկով Ալենն ու Կարենը կատարել են գնումներ և վերցրել վերադարձված մանրը: Նոյեմբերի 26-ին կամ 27-ին երեկոյան Կարենն ու Ալենը Կապանի խանութներից մեկում մանրելու պատրվակով մեկ 20 հազար դրամ տվել են վաճառողուհուն եւ ստացել մանրը: Դրանից մեկ օր անց արդեն տղաները մարզի Լեռնաձոր գյուղում գտնվող խանութում կատարել են գնումներ եւ վճարել 3-րդ 20 հազար դրամով:

Երեքին էլ մեղադրանք է առաջադրվել Քրեական օրենսգրքի 202-րդ հոդվածի 2-րդ մասի 2-րդ կետով (կեղծ փողեր կամ արժեթղթեր պատրաստելը, պահելը կամ իրացնելը, որը կատարվել է մի խումբ անձանց կողմից նախնական համաձայնությամբ եւ նախատեսում է ազատազրկում 6-10 տարի ժամկետով):

Մեղադրական եզրակացությունը հաստատվել է եւ գործն ուղարկվել Սյունիքի մարզի ընդհանուր իրավասության դատարան:

Ավելի վաղ Քննչական կոմիտեն հայտնել էր, որ 2016թ. նոյեմբերին Սյունիքի մարզի երեք անչափահաս բնակիչներ՝ 1999 եւ 2000թթ. ծնված, տպիչով կրկնօրինակելու եղանակով պատրաստել են 20.000 ՀՀ դրամ անվանական արժեքով թղթադրամ, որն իրացրել են նոյեմբերի 28-ին` Սյունիքի մարզի Լեռնաձոր գյուղի խանութում։ Պատանիներից մեկը կեղծ թղթադրամով կատարել է գնումներ։

2016թ. դեկտեմբերի 5-ին ՀՀ ՔԿ Սյունիքի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 202-րդ հոդվածի 2-րդ մասի 2-րդ կետի հատկանիշներով, խանութը շահագործող անհատ ձեռներեցը ճանաչվել է տուժող։

Քրեական գործի շրջանակներում, օրենքով սահմանված կարգով, կատարվել են բնակարանների խուզարկություններ, որոնց արդյունքում հայտնաբերվել է տպիչ սարքը, որն, ըստ քննության տվյալների, օգտագործվել է կեղծ փողեր պատրաստելու համար, տպագրական թղթեր, ինչպես նաեւ համակարգիչների պրոցեսորներ։ Առգրավվել եւ զննվել են խանութի տեսահսկման համակարգի տեսագրությունները եւ կեղծ թղթադրամը: