Փաշինյանի կառավարման ընթացքում պատգամավորներն իրենց կյանքի համար սկսել են վտա՞նգ զգալ

Հայաստանում  վերջին 30 տարվա ընթացքում բազմաթիվ սպանություններ են կատարվել և չեն բացահայտվել: Սակայն երբեք ԱԺ պատգամավորները իրենց այսքան անպաշտպան չեն զգացել: Միանգամից մի քանի պատգամավոր հրապարակավ հայտնել են իրենց մտահոգությունն այդ մասին, և կապ չունի, թե նրանք որ կուսակցությունից են: Օրինակ, Նաիրա Զոհրաբյանը հետևյալ գրառումն է կատարում.  «Ես ինքս այևս չեմ պատրասվում հանդուրժել որոշ պատգամավորների կողմից անձնապես իմ հասցեին այս ամբիոնից հնչեցված սպառնալիքները: Որոշների վերաբերյալ ես արդեն մտածում եմ սկսել իրավական գործընթաց, որովհետև ինձ ուղղակի մարդկայնորեն մտահոգում է մտասևեռումն իմ անձի հանդեպ, ես իմ անձի հանդեպ որոշակի անվտանգության ռիսկեր եմ տեսնում»:

Սակայն պարզվում է, որ նման իրավիճակում է նաև իշխող ուժի ներկայացուցիչ Արեն Մկրտչյանը, ով նույնպես  նշում է բառացի հետևյալը` «Գործընկերս նոր տեղեկացրեց, որ հրապարակային կերպով մահվան սպառնալիքներ եմ ստացել։

Իհարկե, հաղորդում է տրվել ոստիկանություն, բայց ցանկանում եմ ընդգծել՝ պադվալներում պաղկված ստատուսագրերը, նրանց արբանյակ բացահայտված-դուրս շպրտվածները, նրանց թալանչի քաղաքական հայրերը մեկ առ մեկ օրենքի առաջ պատասխան են տալու։ Չկա այլ տարբերակ, տիկնայք և պարոնայք, չկա այլ ելք։ Իսկ մենք ժպտում ենք ու առաջ շարժվում»։

Այսպիսով, եթե հանենք նրանց գրառումների էմոցիոնալ մասը, ապա կստացվի, որ ինչ -որ մեկը ուզում է երկրում ձևավորել վախի մթնոլորտ` հեռու գնացող նպատակներով: Իսկ եթե հաշվի առնենք այն լարվածությունը, որն առաջացել է վերջին 1,5 տարվա ընթացում, երբ հայհոյանքը դարձել է քաղաքական ուժերի հարաբերությունների բնականոն նորմ, ապա կարելի է ասել, որ երկրում հասունանում է ավելի վտանգավոր ճգնաժամ: Երբ հարաբերությունները կարող են թևակոխել այլ հարթության մեջ:

Նշենք, որ երբ մի կողմը բնական է համարում «պատին ծեփել և ասֆալտին պառկեցնելը», ապա մյուս կողմն էլ բնական կարող է համարել,  ասենք, «առաստաղից կախելն ու գետնի տակ մտցնելը»: Սա ֆիզիկայի Նյուտոնի 3-րդ օրենքն է, որը նշում է, որ «...ցանկացած գործողությանը առաջանում է հակառակ գործողությունը և իրանք իրար սկսում են հակազդել...»:

Հատուկ նշենք, որ ֆիզիկայի այս օրենքը գործում է կյանքի բոլոր բնագավառներում, այդ թվում նաև քաղաքական դաշտում: Ահա թե ինչու աստվածաշնչյան այն հայտնի պատգամը, թե «մի վարվիր  ուրիշի հետ այնպես,  ինչպես  չէիր ուզենա, որ քեզ հետ վարվեին» ակտուալ է բոլոր ժամանակների համար, այդ թվում նաև անհավատների համար, ովքեր չեն հավատում Աստծո գոյությանը, սակայն հասկանում են, որ ֆիզիկայի 3-րդ օրենքը միշտ գործում է:

Սա է իրականությունը:

Դավիթ Մկրտչյան