Պետական մրցանակ սահմանող հանձնաժողովներում եղել են բորբոսնած մտածողությամբ չգիտեմ ովքեր. Նաիրա Զոհրաբյան

«Ինձ համար կարևոր չէ, թե այդ մրցանակը նախագահը, վարչապետը, թե կառավարությունը կտա, կարևորը՝ մրցանակը տրվի արդար»: Այս մասին Ազգային ժողովում Կառավարության կողմից 10 պետական մրցանակներ սահմանելու նախագծի քննարկման ժամանակ ասաց «Բարգավաճ Հայաստան» խմբակցության պատգամավոր Նաիրա Զոհրաբյանը:

«Քանի որ տեղյակ եմ, թե մասնավորապես, նույն գրականության ոլորտի մրցանակները, պետական մրցանակ, նախագահի մրցանակ ինչպիսի մարդկանց են տրվել, ներկայացված ինչպիսի գրականության, որ կարդում ու զարհուրում ես, որ ընդհանրապես նման մակուլատուրան կարող էր տպվեր, և մի հատ էլ պետական մրցանակ ստանար, ինչի համար որովհետև սպասարկել են օրվա իշխանության շահը, որովհետև այդ հանձնաժողովները, եղել են բորբոսնած մտածողությամբ չգիտեմ ովքեր: Հիմա էլի կսկսեն ասել` մեզ վիրավորեց, գրողներիս, մտավորականներիս վիրավորեց, լավ եմ անում, որովհետև չէր կարելի այդքան իջեցնել սանդղակը պետական մրցանակների, չէր կարելի գրական խոտանին տալ պետության ամենաբարձր մրցանակը, և այդ կերպ արժեզրկել մեր վերաբերմունքը մեր մրցանակների հանդեպ»,-ասաց նա:

Նաիրա Զոհրաբյանը նշեց, որ պետք է սկսել նրանից, որ նախ հասկանանք, թե ովքեր են այդ հանձնաժողովներում: «Այսօր ես կարող եմ առնվազ 3-4 տաղանդավոր երիտասարդի անուն տալ, որոնք հրաշալի ծրագրեր ունեն, նախաձեռնություն ունեն, բայց, քանի որ որևէ իշխանական կիստայում չկան, ոչ նախկին, ոչ էլ երևի ներկայիս, իրենց ստեղծագործությունների վրա բոլորը թքած ունեն»,-ասաց նա և նշեց, որ մենք պետք է այս մտածելակերպը փոխենք:

«Կառավարությունը տվեց, թե՞ վարչապետը՝ դրանից իմ վստահությունը աստղաֆիզիկայի, ՏՏ կամ գրականության ոլորտի մրցանակների նկատմամբ ավելանալու է՞. եթե այլևս չի տրվելու այն խաղի կանոններով, որ եղել է նախկինում: Միգուցե իրենք իսկապես կարծում են, որ դա գրական շեդևր է, կարող է իրենք արդար մտածում են, որ այս գրական մակուլատուրան գրական շեդևր է»,-ասաց նա և նշեց, թե ով կկախի մեդալը, իր համար բացարձակ էական չէ: