Դատարանն իր տեղում չէ․ դահլիճում կատարվողը բնականոն չի կարող համարվել․ փաստաբան. Տեսանյութ

«Դատարանը պետք է ապահովի դատավարության բնականոն ընթացքը։ Այն, ինչ տեղի է ունենում դատական դահլիճում, բնականոն ընթացք չի կարող համարվել։ Դատարանն իր տեղում չէ և հույս ունենք, որ դատարանն ամեն ինչ կանի, որ այլևս նման բաներ չկրկնվեն։ Եթե դատարանը դա արեց, մենք պետք է մտածենք գործի մասին, ոչ թե՝ ով ինչ կանի»,-դատական հետաձգված նիստից հետո լրագրողներին ասաց ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը։ «Փաստը, որ դատական նիստում կարող է սպառնալիք հնչել, ու դատարանը կարող է այսպես այդ հարցին վրաբերվել, դա է մեզ մտահոգում»,-ասաց Ալումյանը։

Լրագրողի հարցին, թե՝ եթե սպառնալիք է, ինչո՞ւ չեք դիմում ոստիկանությանը, Ալումյանը պատասխանեց․

«Ես մեկ անգամ արդեն դիմել եմ իրավապահներին, երբ վերաքննիչ դատարանի դիմաց բոլորի ներկայությամբ, այդ թվում՝ իրավապահների ներկայությամբ և ձեր ներկայությամբ, մի քաղաքացի սպառնում էր փաստաբաններին սպանել ու մանրամասն նկարագրում էր, թե ինչպես։ 2018 թվականի օգոստոսին դիմել եմ Շենգավիթի ոստիկանությանը, ներկայացրել եմ տեսանյութը, ու որևէ մեկը մինչ օրս պատասխանատվության չի ենթարկվել»։

Նշենք, որ Յուրի Խաչատուրովի փաստաբան Միհրան Պողոսյանը դատական նիստին չէր ներկայացել և դիմում էր ուղարկել դատավոր Դանիբեկյանին՝ նշելով, որ նա չի ապահովում հավասար մրցակցություն և թույլ է տալիս, որ տուժող կողմը վիրավորանք հնչեցնի պաշտպանական կողմի հասցեին։ Դատական նիստը հետաձգվեց մեկ շաբաթով։

Մանրամասն՝ yerevan.today-ի տեսանյութում։