6 մլրդ դոլար դրեցին երեխաների վզին. չեն կարողանալու տանք. Արմավիրի բնակիչ (տեսանյութ)

Ինչպես արդեն տեղեկացրել ենք, «Օհանյան–Րաֆֆի–Օսկանյան» դաշինքի անդամները, ցուցակի առաջին եռյակի՝ գեներալ–գնդապետ Սեյրան Օհանյանի, «Ժառանգություն» կուսակցության փոխնախագահ Արմեն Մարտիրոսյանի և «Համախմբում» կուսակցության նախագահ Վարդան Օսկանյանի գլխավորությամբ, շարունակում են նախընտրական քարոզարշավը  Արմավիրի մարզում:

Գրիբոյեդով գյուղի բնակիչների հետ հանդիպման ժամանակ քաղաքացիներից մեկը դաշինքի անդամներին իր վրդովմունքը հայտնեց միլիարդների հասնող պետական պարտքի հետ կապված. «Եթե մի երկրում հանցագործը չի պատժվում, ինչպե՞ս անենք: 6 մլրդ դոլար դրեցին այս երեխաների վզին, որը մենք չենք կարող տալ: Հանցագործը չի պատժվում: Հանցագործը պետք է պատժվի, որ այսպես չլինի: Ինչպե՞ս անենք»:

Ի պատասխան քաղաքացու արդարացի վրդովմունքի  Սեյրան Օհանյանը պատասխանեց.«Հայրիկ ջան, հետևյալն ասեմ: Նախ և առաջ ասեմ, որ արդարության մասին շատ ենք խոսում, ես ասում եմ նույնիսկ արդարության պարագայում դանդաղ-դանդաղ կարող ենք առաջ շարժվել, բայց մեզ կտրուկ միջոցառումներ, կտրուկ բարեփոխումներ են պետք: Եւ մեզ պետք է թռիչքային աճ: Ես այդ հարցին կպատասխանեմ հետևյալ կերպ, նժդեհյան խոսքերով: Այն երկիրը, որի որդիներն օրենքի և մահվան առջև հավասար չեն, այդ երկիրն ապագա չունի: Մենք ամեն ինչ անելու ենք, որ բոլորն օրենքի առաջ հավասար լինեն և օրենքը խախտողներն անպայման պատժվեն», - ասաց նա:

Zham.am