Այսօր մեկնարկում է ԵԽԽՎ ձմեռային նստաշրջանը

Այսօր Ստրասբուրգում մեկնարկում է Եվրոպայի խորհրդի խոհրդարանական վեհաժողովի (ԵԽԽՎ) ձմեռային նստաշրջանը, որը կտևի մինչև հունվարի 27-ը։

(ԵԽԽՎ) 2017 թվականի նստաշրջանի առաջին մասի աշխատանքներին մասնակցելու նպատակով 2017 թվականի հունվարի 22-28-ը Ստրասբուրգ են (Ֆրանսիայի Հանրապետություն) գործուղվել ԵԽԽՎ-ում ՀՀ ԱԺ պատվիրակության ղեկավար, ՀՀ ԱԺ փոխնախագահ Հերմինե Նաղդալյանը, պատվիրակության անդամներ Սամվել Ֆարմանյանը, Լեւոն Զուրաբյանը, Նաիրա Կարապետյանը, Արմեն Ռուստամյանը, Մհեր Շահգելդյանը:

Ձմեռային նստաշրջանի օրակարգում է ԵԽԽՎ նախագահի, փոխնախագահների ընտրությունը։ ԵԽԽՎ նախագահի պաշտոնում, ամենայն հավանականությամբ, ևս 1 տարով կվերընտրվի ներկայիս նախագահ Պեդրո Ագրամունտը, ով ներկայացնում է Եվրոպական ժողովրդավարական կուսակցությունը։ ԵԽԽՎ ներքին ընթացակարգերի և պայմանավորվածության համաձայն՝ ԵԽԽՎ նախագահությունը փոխանցվում է կուսակցություններին հերթականությամբ։ Նախագահն ընտրվում է 1 տարով, այնուհետ պաշտոնավարումը երկարացվում է ևս 1 տարով։

Օրակարգում ընդգրկված է «Լրագրողների նկատմամբ հարձակումներն ու ԶԼՄ-ների ազատությունը Եվրոպայում» զեկույցի նախագծի քննարկումը, որի զեկուցողն է ուկրաինացի պատգամավոր Վոլոդիմիր Արիևը։ Կլինեն նաև դեբատներ ժողովրդավարական ինստիտուտների գործունեությունը Ուկրաինայում, մարդասիրական ճգնաժամը Գազայում, իրավիճակը Լիբանանում և ռեգիոնալ կայունությանն ու Եվրոպական անվտանգության մարտահրավերները թեմաներով։

Առաջարկվել է նաև անցկացնել հրատապ քննարկում՝ Թուրքիայում ժողովրդավարական ինստիտուտների գործունեության վերաբերյալ։