Նիլոլ Փաշինյանի քայլերի շնորհիվ նախկին օլիգարխ Նեմեց Ռուբոն ռեաբիլիտացվեց և դարձավ գործարար պարոն Հայրապետյան

Ռուբեն Հայրապետյանի վերջին երկու հարցազրույցները (1, 2) կարելի է նրա բենիֆիսը համարել: Երբեք այսքան դրական կերպարով նա հանդես չէր եկել հանրության առջև:

Փորձենք հասկանալ դրա իրական պատճառները: Բանն այն է, որ նախորդ 20 տարիների ընթացքում Ռուբեն Հայրապետյանը մի շարք սուբյեկտիվ և օբյեկտիվ պատճառներով  համարվում էր օլիգարխիկ համակարգի ամենաօդիոզ դեմքերից մեկը: Նրա հետ էր կապված մի շարք աղմկահարույց միջադեպ: Նա իհարկե ուներ նաև դրական կողմեր, սակայն բացասականի ֆոնին այդ դրականը չէր նկատվում: Ինչքանով էր դա արդարացի, այլ հարց է: Պարզ է մեկ բան, որ կոնկրետ բացասական երևույթների հետ մեկտեղ նրա հետ էին կապված նաև մի շարք միֆեր: 

Եվ ահա 2018-ի ապրիլյան հեղափոխությունից 1,5 տարի անց հանրությունը տեսավ Հայրապետյանին նաև այլ կողմից: Նրա վերջին երկու հարցազրույցները ցույց տվեցին, որ նա իսկապես այդքան էլ, կամ՝ միայն բացասական չի ազդել ֆուտբոլի վրա: Նրա կողմից եղել են նաև դրական քայլեր: Բացի այդ, այս պատմությունից մարդիկ  իրենց համար պարզեցին, թե ով է իրականում Անդրանիկ Քոչարյանը:

Ով ընդամենը մի քանի տարի առաջ գովերգում էր Հայրապետյանին, իսկ այսօր՝ փնովում: Ավելին,  ակնարկում է, որ գիտի, որ շուտով Հայրապետյանը հայտնվելու է կալանքի տակ:

Եվ ամենակարևորը,  Հայրապետյանի հանդեպ հետապնդումները չէին լինի, եթե նա ակտիվ մասնակցություն չունենար դեկտեմբերի 23-ին ՀՖՖ-ի նախագահի ընտրարշավին:

Ինչպես հայտնի է, այդ առիթով նրա դեմ քրեական գործ է հարուցված, այն էլ մի քանի հոդվածներով:

Ըստ այդմ, քրգործ է հարուցվել ՀՀ քրեական օրենսգրքի 315-րդ հոդվածի 2-րդ մասի (պաշտոնական անփութություն, որն անզգուշությամբ առաջացրել է ծանր հետեւանքներ), 179-րդ հոդվածի 3-րդ մասի (խոշոր չափերով յուրացում), 325-րդ հոդվածի 2 մասի (մի խումբ անձանց կողմից փաստաթղթեր կեղծելը) եւ 214-րդ հոդվածի 2-րդ մասի (Առեւտրային կամ այլ կազմակերպությունների ծառայողների կողմից լիազորությունները չարաշահելը) հատկանիշներով:

Թեև արդեն բոլորի համար էլ պարզ է, որ Հայրապետյանի դեմ այս գործերը փաստացի «կարվել» են հենց առաջիկայում սպասվելիք ՀՖՖ-ի նախագահի ընտրությունների պատճառով:

Եթե այդ ընտրությունները չլինեին, կամ Հայրապետյանն իրեն այս հարցում ակտիվ չպահեր, ապա վերը նշված գործերը չէին բացվի, ինչը ևս մեկ անգամ փաստում է այն, որ Ռուբեն Հայրապետյանի դեմ  գործերը ոչ թե բացվում են, այլ «կարվում» են: Եվ պարզվում է, որ Նիկոլ Փաշինյանի ասած «Նոր Հայաստանը» մի երկիր է լինելու,  որտեղ ով նրա հետ փորձի հակադրվել, պիտի հայտնվի իրավապահ մարմինների ուշադրության կենտրոնում: Պարզ է, որ սա ոչ մի կապ չունի «Նոր Հայաստան» գաղափարի հետ: Պարզապես մարդկանց այս էմոցիաները գողանալով՝ Փաշինյանը փորձում է դրա վրա կառուցել իր միահեծան կառավարման համակարգը:

Սակայն պարզ է, որ այս ամենից Հայաստանի շարքային քաղաքացին ոչինչ չի շահելու և շուտով հասկանալու է, որ իրեն լկտիաբար խաբել են:

Սա է իրականությունը:

Դավիթ Մկրտչյան