«Ես իմ պատիվը ոչ մեկին չեմ տալու և թույլ չեմ տալու ոչ ոք կպնի ձեր պատվին». Սեյրան Օհանյան

Կոտայքի մարզում այսօր ՕՐՕ դաշինքը հանդիպեց նաև աբովյանցիների հետ: Այստեղ դաշինքի անդամներին դիմավորեցին աղուհացով, այնուհետ քաղաքի երաժշտական դպրոցի դահլիճում՝ երգ ու պարով: Հավաքվել էր մեծ բազմություն, ովքեր ամբողջ հանդիպման ընթացքում ծափողջյուններով իրենց հավանությունն էին արտահայտում դաշինքի բոլոր անդամների նկատմամբ:

Այստեղ ՕՐՕ դաշինքին նրանց միացավ Աբովյան քաղաքում ռեյտինգային ընտրակարգով առաջադրված Հրայր Ասլանյանը: Վերջինս, դիմելով աբովյանցիներին, նշեց, որ ամեն ինչ անելու է իր համաքաղաքացիների կյանքը բարելավելու համար: Այդ իմաստով նա կարևորեց տնտեսությունը, որն ըստ նրա երկրի բարեկեցության երաշխիքն է:

«Ես ձեզնից մեկն եմ և բոլորի նման ես էլ եմ ուզում, որ իմ երեխաներն ունենա այնպիսի պետություն, որը կունենա հաղթանակ և կհամախմբի բոլորին»,-նշեց նա:

Կարճ ելույթ ունեցավ նաև ՕՐՕ դաշինքի անդամ, քառօրյա պատերազմի մասնակից Արթուր Սարգսյանը, ով հուզումնքը մի կերպ զսպելով՝ ասաց, որ կցանկանար այսօր հայերը նույնքան համախմբավծ լինեին, որքան Ապրիլյան պատերազմի օրերին:

ՕՐՕ դաշինքը համալրած հայտնի ռեժիսոր Սարգիս Միքայելյանն էլ իր խոսքում նշեց թե ինչու է ընտրել հենց ՕՐՕ-ին: Պատճառն ըստ նրա այն է, որ դաշինքի առաջնորդներից ոչ մեկի կողքին կանգնելուց, ինքը չի ամաչում:

Աբովյանցիներին իր խոսքը հղեց նաև «Համախմբում» կուսակցության նախագահ Վարդան Օսկանյանը: Նա շեշտեց, որ ինքը ժամանակին հրաժարվել է բոլոր այն պաշտոններից, որ առաջարկել են իրեն իշխանությունները:

« Նույն կերպ վարվել են նաև Րաֆֆի Հովհաննիսյանը և Սեյրան Օհանյանը: Մեզ համար փողն ու պաշտոնը արժեք չեն եղել, եթե լինեին, մենք այստեղ չէինք լինի»,-ասաց նա և հավելեց.

«Թող ոչ-ոք չփորձի համոզել, որ մենք չենք կարող հզոր լինել, քանի որ փոքր երկիր ենք, ռեսուրս չունենք, շրջափակման մեջ ենք, ունենք Ղարաբաղի հարց»:

Ելույթով հանդես եկավ նաև Սեյրան Օհանյանը: Նա ասաց, որ ինքը եղել է զինվորական և քաղաքականության մեջ նորեկ է ու նման քաղաքական թիմի հետ ճանապարհ գնալն իր համար պատիվ է, դաշինքի բոլոր անձինք սկզբունքային են և ազնիվ, ինչպես և ինքը:

«Ես իմ պատիվը ոչ մեկին չեմ տալու և թույլ չեմ տալու ոչ ոք կպնի ձեր պատվին»,-նկատեց նա:

Անի Շաբոյան