Դատավորները, որոնք այս իշխանությանը հաճո որոշումներ չեն կայացնում, հետապնդման են ենթարկվում. Արա Զոհրաբյան. Տեսանյութ

«Մեկ Հայաստան» կուսակցության նախագահ Արթուր Ղազինյանի խոսքով՝ կառավարության այսօրվա նիստի ժամանակ Նիկոլ Փաշինյանի խոսքից պարզ դարձավ, որ նա չի տիրապետում պետական համակարգին, ինչն անձամբ Փաշինյանը խոստովանեց, Անժելա Թովմասյանի՝ «Արմնյուզ» ՀԸ եթերում հեռարձակվող հեղինակային «Հայելու առաջ» հաղորդաշարի ժամանակ ասել է նա։ 

Ըստ Ղազինյանի՝ երբ Փաշինյանն ասում էր, որ նախարարություններից իրեն ուղարկված շատ փաստաթղթերի բովանդակությանը նայելիս, հարց է առաջանում՝ ո՞ր դասարանի երեխա է գրել այն, նրա արդյունքն է, որ Փաշինյանը ևս համոզվեց, որ իր ձևավորած կառավարության շատ անդամներ դեռ դպրոցականներ են։

Հաղորդման մյուսը հյուրը՝ «Փաստաբանների պալատի» նախագահ Արա Զոհրաբյանը, խոսելով ԱԺ-ում վերջին օրերի բուռն քննարկումներից՝ նորից դատաիրավական համակարգի նկատմամբ անվստահությունից, ասել է, որ դեռ հին իշխանությունների ժամանակ է եղել անվստահություն դատաիրավական համակարգի նկատմամբ, խոսել են, որ գործադիրը ճնշում է գործադրում դատարանների նկատմամբ։

«Մենք այսօր էլ ենք տեսնում, որ այն դատավորները, որոնք այս իշխանությանը հաճո որոշումներ չեն կայացնում, հետապնդման են ենթարկվում, մինչդեռ չի կարելի դատավորներին վախեցնել, որովհետև այդ դեպքում վախեցած դատավորը կարող է օրենքը «ծռել» ու օրվա իշխանության ցանկությամբ որոշումներ կայացնել»,– ասել է նա։

Արթուր Ղազինյանի դիտարկմամբ՝ այսօրվա իշխանության կողմից ներգործությունը դատաիրավական համակարգի նկատմամբ շատ ավելի ծանր է, քան նախկինում էր, այսինքն՝ մենք այսօր ունենք շատ ավելի կախյալ դատաիրավական համակարգ։

Երեկ ԱԺ-ն ընդունեց ՍԴ դատավոր-անդամներին վաղաժամ թոշակի ուղարկելու օրենքի նախագիծը։ Անդրադառնալով այս հարցին՝ Արթուր Ղազինյանն ասել է, որ սա պայքար է Սահմանադրական դատարանի դեմ, որը պայքար է պետականության դեմ․ «Եթե Սահմանադրական դատարանը կանգուն մնա մինչև վերջ, ես կհամարեմ, որ հաղթել է պետականությունը»։ Ըստ նրա՝ վաղաժամ թոշակի ուղարկելու օրենքով իշխանությունը ծաղում է դատավորներին։

Արա Զոհրաբյանն էլ կարծում է, որ այս իշխանությունը իրավական հարցերում կաղում է․ «Ես դեմ եմ ՍԴ դատավոր անդամներին վաղաժամ թոշակի ուղարկելուն, որովհետև դատական իշխանությունը քաղաքական կառույց չէ, որպեսզի, ինչպես ԱԺ-ն, կառավարությունն են փոխվում, այդպես փոխվի նաև դատական իշխանությունը»։

Ըստ Զոհրաբյանի՝ այն դատավորը, որը կհամաձայնի վաղաժամ թոշակի գնալ, ու երբ հետագայում կգա մեկ այլ իշխանություն, որը կասի, որ այս օրենքը հակասահմանադրական է, այդ ժամանակ վաղաժամ թոշակի գնացած դատավորները, որպես դատավորներ, կզորայանան։

Հաղորդմանը հրավիրված է եղել նաև «Իմ քայլական» պատգամավոր, ԱԺ պետաիրավական հանձնաժողովի նախագահ Վլադիմիր Վարդանյանը, ով անհասկանալի պատճառներով չի ներկայացել հաղորդմանը։

Մանրամասները՝ տեսանյութում