Առողջապահության նախարարությունը Արտյոմ Սմբատյանի ապօրինի պաշտոնավարման մեղքը բարդում է վարչապետի վրա

2019թ.-ի մարտին ՀՀ կառավարության որոշմամբ Առողջապահության նախարարության գլխավոր քարտուղարի պաշտոնակատար նշանակված Արտյոմ Սմբատյանը չի մասնակցում այդ թափուր պաշտոնի համար 2019թ. դեկտեմբերի 23-ին կայանալիք մրցույթին, գրում է  «Փաստինֆո»-ն։ Ըստ կայքի տրամադրության տակ եղած տվյալների՝ մրցույթին չմասնակցելու պատճառն այն է, որ վերջինս չի համապատասխանում գլխավոր քարտուղարի պաշտոնի համար նախատեսված օրենքով սահմանված պահանջներին: Փաստացի, շուրջ 9 ամիս բարձր պաշտոն զբաղեցնող Սմբատյանի պաշտոնավարումն ապօրինի է:

Կայքը հիշեցնում է, որ Առողջապահության նախարարության աշխատակազմի ղեկավար-գլխավոր քարտուղարի թափուր պաշտոնի համար 2019թ. դեկտեմբերի 23-ին կայանալիք մրցույթին մասնակցելու համար դիմել է երեք քաղաքացի՝ Արման Ոսկանյանը, Նունե Մարտիկյանն ու Վարդան Գրիգորյանը: Մրցույթին դիմած քաղաքացիներից մեկի՝ Վարդան Գրիգորյանի դիմումը մերժվել է, իսկ մյուս երկուսինը՝ ընդունվել:

«Փաստինֆո»-ն գրավոր հարցում է ուղարկել Առողջապահության նախարարություն՝ խնդրելով տրամադրել Արտյոմ Սմբատյանի կենսագրությունը: Մինչդեռ, նախարարությունը հրաժարվել է տրամադրել գլխավոր քարտուղարի պաշտոնակատարի կենսագրությունը՝ պատճառաբանելով, թե նրա անձնական գործը չի գտնվում նախարարությունում:

Գլխավոր քարտուղարի տեղակալ Վահե Հակոբյանի ստորագրությամբ ստացված պատասխանում նշվում է, թե գլխավոր քարտուղարներին պաշտոնի նշանակում եւ պաշտոնից ազատում է ՀՀ վարչապետը։ «Այսպիսով՝ Արտյոմ Սմբատյանի փաստաթղթերը առողջապահության նախարարությունում չեն գտնվում , հետեւաբար չեն կարող տրամադրվել»,- նշված է պատասխանում։ Ասել է թե՝ Առողջապահության նախարարը գլխավոր քարտուղարի ապօրինի պաշտոնավարման մեղքը, ըստ էության, բարդում է կառավարության ղեկավարի վրա։

Համաձայն մամուլում եղած տեղեկությունների, Արտյոմ Սմբատյանը առողջապահության նախարար Արսեն Թորոսյանի հովանավորյալն է և այդ պաշտոնում է նշանակվել նախարարի հետ ունեցած մտերմության շնորհիվ: Նիկոլ Փաշինյանին հենց Թորոսյանն է միջնորդել, որպեսզի Սմբատյանին նշանակի գլխավոր քարտուղարի պաշտոնում, իսկ այժմ փորձում է մեղքը բարդել է վարչապետի վրա:

Կայքը նաև նկատում է, որ անկախ այն հանգամանքից, որ կոնկրետ պաշտոնյան նշանակվում է վարչապետի կամ նախագահի կողմից, յուրաքանչյուր պետական գերատեսչությունում գոյություն ունի կադրերի բաժին, որտեղ պահվում են բոլոր աշխատակիցների անձնական գործերը, նրանց ինքնակենսագրությունը, դիպլոմների պատճենները, գործուղումների և արձակուրդների մասին հրամանները: