Լավրովը պատասխանեց Փաշինյանի կոչին, իսկ Մոսկվան եւ Բաքուն ղարաբաղյան հարցում փոխզիջման հնարավորություն էն տեսնում. Տեսանյութ

Բրատիսլավայում վաղը՝ դեկտեմբերի 4-ին Հայաստանի և Ադրբեջանի ԱԳ նախարարներ Զոհրաբ Մնացականյանի և Էլմար Մամեդյարովի սպասվող հանդիպման արդյունքներով ակնկալվում է հնգակողմ հայտարարության ընդունում։ Այս մասին Ադրբեջանի ԱԳ նախարար Էլմար Մամեդյարովի հետ համատեղ ասուլիսին հայտարարեց ՌԴ ԱԳ նախարար Սերգեյ Լավրովը։

Վերջինիս փոխանցմամբ՝  ՀՀ եւ Ադրբեջանի ԱԳ նախարարների հանդիպումը, Բրատիսլավայում տեղի կունենա երկու նախարարների շփումը նաեւ ԵԱՀԿ ՄԽ համանախագահների հետ։

«Ամեն տարի ԵԱՀԿ Նախարարների խորհրդում ձգտում ենք արձանագրել թղթի վրա հավատարմությունը հիմնարար սկզբունքներին, որոնք հավանության են արժանացել կողմերի կողմից արդեն երկար տարիներ առաջ և պահպանում են իրենց կենսունակությունն ու արդիականությունը։ Եվ, եթե հաջողվի, մենք կցանկանայինք ընդունել հնգակողմ հայտարարություն՝ երկու նախարարների և ԵԱՀԿ Մինսկի խմբի երեք համանախագահ երկրների նախարարների մասնակցությամբ։ Եթե ինչ-ինչ պատճառներով դա հնարավոր չլինի, այնուամենայնիվ երեք համանախագահներն իրենց դիրքորոշումը թղթի վրա կարտահայտեն։ Սակայն հուսով եմ, որ դա կլինի հնգակողմ հայտարարություն», - ասել է Լավրովը։

Լավրովը ասուլիսի ժամանակ անդրադարձել է Հայաստանի վարչապետ Նիկոլ Փաշինյանի՝ Ադրբեջանին զենք չվաճառելու ՀԱՊԿ երկրներին ուղղված կոչին, որը վերջինս արել էր ՀԱՊԿ գագաթաժողովի ժամանակ։

«Ես կարող եմ ասել, որ  ռազմատեխնիկական համագործակցությունը Ադրբեջանի հետ մեր գործակցության կարևոր ոլորտներից է։ Մենք այդ գործակցությունը զարգացնում ենք բացարձակ թափանցիկ, միջազգային իրավունքի, Ադրբեջանի և Ռուսաստանի օրենսդրությունների նորմերին համապատասխան, և հաշվի առնելով այն հավասարակշռությունը, որ այս տարածաշրջանում ձևավորվել է, և կարևոր է, որ այստեղ պահպանվի կայունությունը»- ասել է  ՌԴ ԱԳ նախարարը։

Անդրադառնալով հայ եւ ադրբեջանցի լրագրողների փոխայցելությանն ու հարցին՝ արդյո՞ք օգտակար կլիներ «Ղարաբաղի ադրբեջանական եւ հայկական համայնքների» շփումները, Սերգեյ Լավրովը պատասխանեց՝ հիշեցնելով տարեսկզբին Վիեննայի գագաթնաժողովից հետո 2 երկրների ԱԳ նախարարների մոսկովյան հանդիպման մասին, որտեղ համաձայնեցվեց ոչ պաշտոնական փաստաթուղթ հումանիտար շփումների հաստատման ուղղությամբ։

«Ես կարծում եմ, որ դա շատ կարեւոր , որովհետեւ ցանկացած որոշում պետք է ընդունվի մարդկանց կողմից , որոնք ապրում են այդ հողում, որոնք ապրում են Ադրբեջանում Հայաստանում եւ Ղարաբաղում եւ որքան առավել մոտիկից մարդիկ միմյանց հետ շփվեն, որքան ավելի օբյեկտիվ լրագրողները լուսաբանեն, թե ինչ է կատարվում շփման գծից այն կողմ, այնքան ավելի դյուրին ու կայուն կլինեն այն պայմանավորվածությունները, որոնց մենք ձգտում ենք հասնել։ Ես ամեն կերպ կողմ եմ, որ ղարաբաղյան համայնքների միջեւ կապեր վերահաստատմանը, որոնք, ի դեպ, որոշակի փուլում իրականացվում էին, հետո սառեցվեցին։ Սա շատ հեռանկարային թեմա է, որովհետեւ արդյունքում, այնուամենայնիվ, ԼՂ-ի ամբողջ բնակչությունը պետք է որոշի՝ ինչպես ապրել հետագայում»,-հայտարարեց Լավրովը։

Խոսելով Լավրովի հետ Լեռնային Ղարաբաղի խնդրի կարգավորման շուրջ բանակցությունների մասին՝ Մամեդյարովը նշել է, որ այն շատ լուրջ խնդիր է ինչպես Ռուսաստանի հետ երկկողմ հարաբերությունների ձևաչափում, այնպես էլ բազմակողմ ձևաչափում, քանի որ Ռուսաստանը ԵԱՀԿ Մինսկի խմբի համանախագահ երկիր է։

«Մենք բացարձակապես վստահ ենք, որ հարկավոր է առաջ շարժվել, քանի որ գոյություն ունեցող այն իրավիճակը՝ ոչ խաղաղություն, ոչ պատերազմի վիճակը, ոչ մի տեղ չի տանում։ Այո, խաղաղությունը շատ բարդ է, միգուցե հարկավոր է փուլային,- ոչ թե միգուցե, այլ ավելի շուտ,- փուլային տարբերակը, որ կմաքրի բանակցությունների սեղանը ձգձգող տարրերից, և  առաջին հերթին հարկավոր է, ինչպես ասվում է, որ բանակը վերադառնա զորանոցներ և ոչ թե մնա դաշտերում»,- ասել է Մամեդյարովը։

Նրա խոսքով՝  դա հնարավորություն կտա ներքին տեղահանվածներին և փախստականներին վերադառնալ, կապաշրջափակի տնտեսական հնարավորությունները, ճանապարհները։

«Ես կարծում եմ, որ սկզբունքորեն տրամաբանությունն այդպիսին է։ Կարգավորումը պետք է նախևառաջ տեղի ունենա այն կոնտեքստում, որ այդ համագործակցությունը կբերի բարգավաճման»,- ասել է Մամեդյարովը։

Մանրամասները՝ տեսանյութում:

Zham.am