Եթե դատախազը ձգտում է իրականությունը խեղաթյուրել ի վնաս պաշտպանական կողմի, նման դատախազը վարույթում ընդհանրապես անելիք չունի. Ռ. Քոչարյանի պաշտպանը` Պետրոս Պետրոսյանի մասին
Երևանի ընդհանուր իրավասության դատարանի Շենգավիթի նստավայրում դատավոր Աննա Դանիբեկյանի նախագահությամբ շարունակվում է Ռ. Քոչարյանի պաշտպանների՝ դատախազ Պետրոս Պետրոսյանին ներկայացրած բացարկի միջնորդության քննությունը։
Հիշեցնենք, որ նախորդ դատական նիստում Ռոբերտ Քոչարյանի պաշտպաններից Հովհաննես Խուդոյանն էր միջնորդություն ներկայացրել նրան ինքնաբացարկ հայտնելու: Այսօր դատավարության մեկնարկին դատախազ Պետրոս Պետրոսյանին բացարկ հայտնելու առանձին միջնորդություն ներկայացրեց պաշտպանության նախկին նախարար Սեյրան Օհանյանի պաշտպան Կարեն Մեժլումյանը:
Միջնորդությունը ներկայացնելուց հետո, միջնորդությանը միացան նաև մյուս պաշտպանները: Մասնավորապես` Ռոբերտ Քոչարյանի պաշտպաններից Հայկ Ալումյանը նշեց, որ միանշանակ միանում է միջնորդությանը:
«Դատախազներն իրոք դատարանում նրա համար են, որ մեղադրանքը պաշտպանեն, բայց դա չի նշանակում, որ իրենք մեղադրանքը պետք է պաշտպանեն ցանկացած գնով, դա չի նշանակում, որ դա իրենք պիտի անեն՝ հաստատապես իմանալով հակառակի մասին: Մեղադրանքն իրենք պետք է պաշտպանեն այն ժամանակ, երբ վստահ են դրանում, այս իրավիճակում դա այդպես չէ: Դատախազները, իմանալով արդարացնող ապացույցների մասին, միջոցներ չեն ձեռնարկել, որ այդ արդարացնող ապացույցները հայտնվեն քրեական գործի մեջ: Դատախազները մեղադրանքը փորձում են պաշտպանել ոչ պատշաճ մեթոդներով՝ իրականությունը խեղաթյուրելով»,- ասաց Հայկ Ալումյանը:
Նա շեշտեց, որ եթե դատախազը ձգտում է իրականությունը խեղաթյուրել ի վնաս պաշտպանական կողմի, ապա նման դատախազը վարույթում ընդհանարապես անելիք չունի: «Տվյալ դատախազը պետք է մեկուսացվի տվյալ վարույթից ու մոտիկ չգա այդ վարույթին, դա վտանգավոր է դատավարության համար»,- ասաց նա:
Բացի այդ, նա միացավ Մեժլումյանի այն պնդմանը, թե մեղադրանքը ձևակերպված է այնպես, որ պաշտպանական կողմը չկարաողնանա հասկանալ, թե ինչ քրեաիրավական որակումներ են և որտեղից են ծագել դրանք:
Մանրամասները՝ Tert.am-ի տեսանյութում:
Հետևեք մեզ Facebook-ում