Հասարակական համերաշխության հաստատումը շուռ կգա հենց իշխանության դեմ, քանի որ կոտորակված հասարակությանն ավելի հեշտ է կառավարել. Աղասի Ենոքյան (տեսանյութ)

Չկան քաղաքական ընդդիմադիր ուժեր, խորհրդարանական ընդդիմությունն ավելի շատ ծառայում է Նիկոլ Փաշինյանի խնդիրների լուծմանը: «Արմնյուզ» ՀԸ «#ՕրաԽնդիր» հաղորդմանը նման կարծիք է հայտնել «Մեդիա պաշտպան» նախաձեռնության ղեկավար, քաղաքագետ Աղասի Ենոքյանը. «Ինչ վերաբերում է արտախորհրդարանական ընդդիմությանը, այն չի կարողանում նախ իր ձևաչափը ճշգրտել, և ապա՝ վախենում է Նիկոլ Փաշինյանի կողմից թիրախավորվելուց: Ամեն դեպքում, քաղաքական ուժերի առաջնահերթ խնդիրը մարդկանց փողոց դուրս բերելը չէ»:

Ըստ քաղաքագետի՝ պետք չէ մեծ հույսեր ունենալ, թե «Կուսակցությունների մասին» ՀՀ նոր օրենքը քաղաքական դաշտը կզուլալեցնի. «Ներկա իրավիճակը ձեռնտու է Նիկոլ Փաշինյանին: Բիզնեսին այլևս շահավետ չէ անմիջականորեն մնալ քաղաքականության մեջ: Քաղաքականությունն ավելի շատ ֆինանսավորվում է ստվերային կողմերով, միջնորդավորված: Միայն ԲՀԿ-ն է, որ յուրահատուկ դեպք է մեր իրականության մեջ»:

Աղասի Ենոքյանի կարծիքով՝ իշխանությանը ձեռնտու չէ հասարակական համերաշխության հաստատումը, քանի որ եթե նման քայլեր արվեն, սև-սպիտակ բաժանումը վերացվի, կլինեն ընդդիմադիր կուսակցությունների միավորումներ. «Վախի մթնոլորտում համերաշխություն ստեղծելը կլինի հակաիշխանական, այն շուռ կգա իշխանության դեմ, և հակառակը՝ որքան իշխանությունն ավելի կոտորակի հասարակությանը սևերի և սպիտակների, այնքան ավելի հեշտ կլինի կառավարել»:

«Եթե Նիկոլ Փաշինյանի թիմն ասում է՝ նախկինները ռևանշիստներ են, ընդդիմադիրներն էլ ասում են՝ ներկաները ստալիններ են: Մենք տեսնում ենք, որ մարդկանց տանում, նստեցնում են, հետո նոր որոշում՝ ինչ հոդված դնել նրանց վրա»,- ասել է քաղաքագետը:

Աղասի Ենոքյանի կարծիքով՝ ամբողջական իշխանության համար Փաշինյանին պետք է նաև Արցախը, որն իրեն չի ենթարկվում և չպետք է ենթարկվի. «Մինչև հիմա ՀՀ-ի և Արցախի իշխանություններն ունեցել են նույն գենեզիսը՝ արցախյան շարժումը: Փաշինյանն իշխանության է եկել դրանից դուրս, և բնական է, որ նրանց մեջ կարող են լինել տարընթերցումներ: Արցախի հարցը հիմնական հարցն է, որը Նիկոլ Փաշինյանը պետք է լուծի, իսկ նա չի արտահայտել իր մոտեցումները, կամ էլ դրանք եղել են հակասական ու դեկլարատիվ»:

Ենոքյանի կարծիքով՝ Փաշինյանը շատ հեշտ լուծեց օլիգարխների հարցը՝ ասելով, թե նրանք գործարար են. «Օլիգարխները չեն եղել ՀՀԿ-ինը կամ Քոչարյանինը, նրանք եղել են պետության ղեկավարինը, հիմա ղեկավարը փոխվել է, նրանք իրենց լոյալությունն են հայտնում նոր ղեկավարին»,- ամփոփել է քաղաքագետը: 

Մանրամասները տեսանյութում

Աղբյուր՝ Tert.am