Գալուստ Սահակյանը շնորհավորական ուղերձ է հղել Մարտի 8-ի առթիվ
ԱԺ նախագահ Գալուստ Սահակյանը շնորհավորական ուղերձ է հղել Կանանց միջազգային տոնի առթիվ, որում ասվում է.
«Սիրելի՛ կանայք, շնորհավորում եմ ձեզ Կանանց տոնի առթիվ:
Այն ջերմությունը, որ կնոջ շնորհիվ ստեղծվում է ընտանիքում, յուրահատուկ է:
Այն երջանկությունը, որ կնոջ շնորհիվ թևածում է ընտանիքում, անչափելի է: Համերաշխության և հանդուրժողականության այն մթնոլորտը, որ կնոջ շնորհիվ ձևավորվում է ընտանիքում, անգնահատելի է:
Պետությունը մի մեծ ընտանիք է, որտեղ երջանկությունը, համերաշխությունն ու հանդուրժողականությունը նույնչափ անհրաժեշտ ու կարեւոր են: Ամուր պահելով և զորացնելով ընտանիքը՝ դուք ամուր եք պահում նաև երկիրը, երկրի սահմանները, երաշխավորում երկրի վաղվա օրը, երկրի անվտանգությունն ու առաջընթացը:
Ձեր դաստիարակած զավակներն այսօր մեր հայրենիքի հույսն ու ապավենն են, խաղաղության և անվտանգության հուսալի երաշխավորը: Ձեր շնորհիվ խաղաղությունը, մեր անվտանգությունը միշտ ապահով ձեռքերում են, քանզի հայրենիքի զինվորը, հայրենիքին երդվելով, երդվում է նաեւ մոր առաջ:
Համոզված եմ, որ վաղվա օրը լինելու է ավելի լուսավոր եւ ավելի ապահով, և դրանում, վստահաբար, շարունակելու է նշանակալից մնալ ձեր դերը, սիրելի՛ կանայք:
Եվս մեկ անգամ շնորհավորելով այս ջերմ ու գեղեցիկ տոնի առթիվ` մաղթում եմ ձեզ, սիրելի՛ կանայք, առողջություն, բարեկեցություն, սեր ու լավատեսություն»:
Հետևեք մեզ Facebook-ում