Հատկապես «բ» կետը շատ հետաքրքիր է. Արսեն Բաբայանը պետք է ազատ արձակվի
Քաղբանտարկյալ Արսեն Բաբայանի պաշտպան Երվանդ Վարոսյանը հատված է հրապարակել կալանավորման դեմ ներկայացված վերաքննիչ բողոքից.
«Կարծում ենք, որ այս առումով [քննչական մարմնի կողմից] տեղի է ունեցել նաև ՀՀ քրեական օրենսգրքի 300-րդ հոդվածի [«Իշխանությունը յուրացնելը»] կամայական ու սխալ մեկնաբանություն: Սահմանադրական դատարանի լիազորություններին տիրանալ հանցակազմ [որպես «Իշխանությունը յուրացնելու» դրսևորում] առհասարակ կարող էր առկա լինել օրինակ հետևյալ երկու պարագաներում՝ ա/ «Փակվում» է Սահմանադրական դատարանը, փոխարենը ստեղծվում է օրենքով չնախատեսված անձանց խումբ, ովքեր Սահմանադրության խախտմամբ ստանձնում են ՍԴ լիազորությունները, բ/ տարատեսակ ճնշումներով, անվանարկող հոդվածներով, քրեական գործերի հարուցմամբ, մտերիմ անձանց կալանավորելով, «կամավոր» վճարվող թոշակի գնալու օրենսդրական առաջարկներով, հեռանալու ուղիղ հրապարակային պահանջներով կամ այլ եղանակով մարդկանց մի խումբ փորձում է հասնել ՍԴ նախագահի, ապա նաև որոշ դատավորների հրաժարականներին, փոխարենը ապահովում է Սահմանադրական դատարանում 5 դատավորի առկայություն, ովքեր պատրաստ են կատարել այդ խմբի կամքը»:
Այս փաստարկումը, հատկապես «բ» կետը, շատ հետաքրքիր է։ Արսեն Բաբայանը փաստացի մեղադրվում է իշխանության յուրացմանն օժանդակելու համար։ Սակայն Արսեն Բաբայանին ԻՇԽԱՆՈՒԹՅԱՆ ՅՈՒՐԱՑՄԱՆ մեջ մեղադրելով ու զնդանելով ըստ էության իրականացվում է ԻՇԽԱՆՈՒԹՅԱՆ ՅՈՒՐԱՑՄԱՆ փորձ (կամ առնվազն նախապատրաստություն)։ Ահա այսպիսի իրավական ֆուտուրիզմ։
Վաղվա Հայաստանում մասնագիտական տեսանկյունից անչափ հետաքրքիր դատավարություններ են սպասվում։
ՀԳ. Արսեն Բաբայանը պետք է ազատ արձակվի։
Ռուբեն Մելիքյանի ֆեյսբուքյան էջից
Հետևեք մեզ Facebook-ում