Գերմանիայի ԱԳՆ ղեկավարը Թուրքիայի հետ հարաբերությունները «շատ լարված» որակեց

Գերմանիայի ԱԳ ղեկավար Զիգմար Գաբրիելը ներկայում Թուրքիայի հետ հարաբերությունները «շատ լարված» անվանեց: Հաղորդում է «ՌԻԱ Նովոստի»-ն:

«Հարաբերությունները շատ լարված են և մեր խնդիրը՝ կարգավորել դրանք», - ասաց Գաբրիելը լրագրողներին Բրյուսելում երկուշաբթի ԵՄ անդամ երկրների ՊՆ նախարարների և ԱԳ ղեկավարների համատեղ նիստից առաջ: 

Բեռլինի և Անկարայի միջև հարաբերությունները լարվեցին թուրքական ծագում ունեցող գերմանացի լրագրող Դենիզ Յուջելի կալանավորումից հետո Ստամբուլում: Նա թուրքական իշխանությունների կողմից մեղադրվում է «ահաբեկչական կազմակերպությունում մասնակցություն ունենալու, տվյալների անօրինական օգտագործման, ահաբեկչության քարոզչության»: Գերմանիայի կանցլեր Անգելա Մերկելը պահանջեց Անկարայից ազատել Յուջելին և հարգել ԶԼՄ-ի ազատությունը: Նախորդ կիրակի Թուրքիայի նախագահ Ռեջեփ Թայիփ Էրդողանը համեմատեց Բեռլինի ներկայիս քաղաքականությունը «նախկինում նացիստների գործողությունների» հետ, ինչով էլ առաջացրեց Գերմանիայի դժգոհությունը:

Ապրիլի 16-ին Թուրքիայում կկայանա սահմանադրական հանրաքվե: Գերմանիայում քվեարկության իրավունք ունեցող մոտ 1.41 մլն թուրք է բնակվում:

Zham.am