Շրջանառության մեջ դրվեց «Ալեքսանդր Մանթաշյանի ծննդյան 175-ամյակը» թեմայով մեկ նամականիշ

Գեղագիտության ազգային կենտրոնում մարտի 3-ին հանդիսավոր մարվեց և
փոստային շրջանառության մեջ դրվեց «Ալեքսանդր Մանթաշյանի ծննդյան
175-ամյակը» թեմայով մեկ նամականիշ:

Նամականիշի մարումն իրականացրին ՀՀ տրանսպորտի, կապի և տեղեկատվական
տեխնոլոգիաների նախարար Վահան Մարտիրոսյանը, Հայաստանի արդյունաբերողների և
գործարարների միության նախագահ Արսեն Ղազարյանը, Հայաստանի ֆիլատելիստների
միության նախագահ Հովիկ Մուսայելյանը և «Հայփոստ» ՓԲ ընկերության գլխավոր
գործադիր տնօրենի ժամանակավոր պաշտոնակատար Հայկ Ավագյանը:

Խոսելով Հայաստանում գործարարության ավանդույթների և զարգացման մասին՝
Վահան Մարտիրոսյանը նշեց, որ ՀՀ կառավարության որոշմամբ այս տարի առաջին
անգամ Մանթաշյանի ծննդյան օրը՝ մարտի 3-ը, նշվում է որպես հայ գործարարի
օր։ «Այդ առիթով Փոստային վճարման պետական նշանների հարցերով խորհրդին
նախարարության կողմից առաջարկություն եղավ՝ Ալեքսանդր Մանթաշյանի ծննդյան
175-ամյակի առթիվ թողարկել նամականիշ»,- նշեց նախարարը։

20-րդ դարասկզբի խոշոր նավթարդյունաբերող, հայ նշանավոր գործարար,
բարեգործ Ալեքսանդր Մանթաշյանի պատկերով փոստային նամականիշը ձևավորված է
հին թղթադրամի տեսքով: Նամականիշի խորապատկերին ներկայացված են Ալեքսանդր
Մանթաշյանի միջոցներով կառուցված Փարիզի Ելիսեյան դաշտերում գտնվող
հայկական Սուրբ Հովհաննես Մկրտիչ եկեղեցին և Թիֆլիսի հայ արտիստների
միության շենքի ճակատային մասը, որն այսօր Թբիլիսիի ակադեմիական թատրոնի
շենքն է։

Փոստային նամականիշն ունի 380 դրամ անվանական արժեք: Նամականիշի հեղինակն
է Վահագն Մկրտչյանը: Նամականիշի չափսերն են՝ 50,0 x 40,0 մմ, տպաքանակը՝ 40
000 հատ։ Տպագրվել է Ֆրանսիայի «Cartor» տպարանում։

ՀՀ տրանսպորտի, կապի և տեղեկատվական տեխնոլոգիաների
նախարարության լրատվական ծառայություն